江嵐 / 曾文溪个歌聲

江嵐(江秀鳳)《曾文溪个歌聲》
榮獲２００７年
南瀛文學奬現代詩首奬

用十首客家詩送出去，完全無註解，還得到首奬
試到南瀛文學奬有尊重客家，當承蒙台南人介相惜
做得用客家詩得到奬，捱想頒獎典禮介時節愛用阿姆話
唸詩代表致詞較實疊，分台南盡少客家人介所在
聽得到恩哩客家話介優雅文字化

---江嵐　


●曾文溪个歌聲


係麼儕在這恬靜个月夜彈唱

一波一波對遠遠个暗夜傳來

一首鄒族＜Homeyaya＞个歌聲

對這隻山頭映過該隻山

聽到曾文溪對山頂一路唱下來

唱出阿里山風雲湧起个聲勢

唱出鄒族少年英雄大膽个打獵過程


算來係奈位傳來个歌聲

分捱聽到鷂婆佬大頭鰱打嘴古

青銅製个鈴琅仔佬總統魚喊醒

好搞水个鴨仔在曾文溪邊泅來泅去

一幅闊闊个嘉南平洋物產豐富个景象


一首＜Homeyaya＞个歌聲

分捱聽到毋記得睡目

千支青竹做弦

萬頭綠樹做凳

分來來往往个烏面琵鷺坐聊

萬頃良田分油菜花打扮到靚靚


一條山歌唱過１３８公里遠

在鑼鼓鬧天个七股出海

曾文溪唱出流動个歌聲水影

一生人在吾个耳公頭回響


● 玉蘭花 / 江　嵐


　　 新婚該年

　　種一頭玉蘭花

　　佇禾埕

　　用菜梗佬洗衫水淋大

　　毋多知仔

　　賴仔討夫娘該暗晡

　　比心舅賴仔卡高卡大个

　　玉蘭花

　　續好恬恬開等滿樹个花

　　分食喜酒个人客

　　食到歸圓身个香氣

　　帶轉屋家去


　　愐到該央時

　　賴仔出世就無阿爸

　　奶合目汁畜到今

　　逐年就佬玉蘭花比高

　　成時係目汁相對

　　成時係子哀對相

　　玉蘭花日日用自家个笑容

　　安慰佢兩儕


　　人客散淨（ciang）

　　脫下做家娘个新衫

　　手腳洗好入間房

　　烏色老骨董个櫃仔頂

　　放等一盤雪白个玉蘭花

　　佬心舅打个一對手扼

　　　　　　　　　2006.12.12在西拉雅柚仔樹下