詩想起 ----- 老伙房

三十年前，

我離開老伙房介時節，

大禾埕一群細人仔，

佇該歡天喜地走相逐！



三十年後，

我滿心期待歸去老伙房，

無愐到看著介係，

大禾埕一群禾畢仔，

佇該興咋咋打嘴鼓相吵事！



該兜走相逐介細人仔，

到底逐去奈位也？

仰會存到禾畢仔，

歇佇老伙房？



鄉親既經四散，

舊漏屋舍下，

毋見頭擺叔婆伯母，

天光暗晡無閒介身影。

耳覺覺想愛聽老旺伯，

輒常背傴傴佇屋背細圳溝唇，

咳出連環炮樣仔介粗礪嗽聲，

半息都聽無到咧！



這時節麼儕同我企共下？

單淨臨暗懶懶日頭下，

尋毋著故鄉介，

我霧霧介影仔。



附註--------------------

該日：那天 時節：時候 細人仔：孩子們

佇該走相逐：在那兒追逐嘻戲 無愐到：沒料到

禾畢仔：麻雀 興咋咋：興沖沖 該兜：那些 奈位：那裡

仰會存到：怎會剩下 歇：住 頭擺：從前

天光暗晡：曰日夜夜 耳覺覺：豎起耳朵仔細聽

輒常：經常 麼儕：誰

企共下：站在一起 單淨：衹有