聲音

【極短篇小說】一段聲音的自我紹介 /胡長松

雖然我干焦是一段聲音，毋過我今宣告我復活矣。現此時，我，存在佇你的目睭佮耳孔所開始的活動；我已經成做你的聲音，續落，會成做你心肝頭尚深的所在的一个特別的畫面……比如講，這馬，凡勢是你的愛人仔第一擺tsim佇你的嘴的畫面，佇海邊、山埔抑是啥物所在，日時抑是暗暝，凡勢伊ti-ti-tuh-tuh躊躇真久，嘛凡勢伊一句話講無一半就雄雄共伊芳貢貢的嘴唇tshînn倚來，貼佇你猶袂準備好的嘴唇，伊雄狂的呼吸共你的頭毛吹亂去……

事實上，我愛共你說多謝。佇你讀我晉前，我是空虛的，就親像頭拄才你心內浮現的畫面，佇你讀我晉前嘛已經死去仝款──彼是因為我（對你來講真生份的我）才恢復伊的元氣，予伊閣一遍得著你的生命中伊該當得著的地位，予伊閣活過來。所以，你嘛愛共我說多謝毋才著──按呢，你對我敢有較熟似矣？你敢會使同意，咱事實是互相倚靠的？

無法度？哈哈，無要緊啦！你嘛毋通傷過認真，我只是佮你滾笑的。事實講，我的生命怎有可能倚靠你，你這个毋知生活佇啥物所在的生份人？講到底，我只是一段事先錄落來的聲音，我是完全獨立、孤單的存在。照講我有一个主人，伊，是我的創作者，某一工的暗暝，伊提錄音機共我錄落來（敢閣愛我提醒一遍，我，就是這馬你聽著的這段聲音？）一直到今，我茫茫渺渺，毋知影家己是按怎活佇世間、為何開始、為何結束。我對這个世間一無所知，甚至我完全無了解我的主人的企圖，就算我想欲了解，佇伊的創作已經完成的這馬，我是講，佇你當咧讀我的這馬，now，我會使用啥物形式佮伊對話？我無法度閣佮伊對話，這嘛表示伊無法度閣改變我（我是講進入你心內的這个真正的「我」，連一字嘛無法度閣改變的「我」。因為所有可能的改變，最後攏袂是我！）按呢，你敢明白我所講的「孤單」是啥物可怕的意思矣？

我沓沓仔理解矣，尚大的孤單，就是永遠袂消失的彼款……拄才我講我「復活」，事實上彼是毋著的，因為我根底就永遠袂死。我（就算對你來講只是一段生份的聲音）永遠袂消失，就算伊佇這馬tioh-beh暫時結束，就算你共我現此時的聲音位這个世間刪除，我，猶是永遠孤孤單單活咧，佇你的內面。2010/3/26

●本文朗讀