客語詩選

●「大禾埕」 陳寧貴

大禾埕盡像人生个舞台

蓋多戲在這位

一遍又一遍演出

農忙時節晒穀晒豆

晒到人面像紅面番鴨公

大人同細人講毋好亂走

當當晝晝鬼上樹

平常時節

細人在大禾埕搞聊

散落一地

歡歡喜喜个腳步聲

暗晡頭時節

大人端凳來大禾埕

講頭擺生趣事情

汝一言我一語盡像畫符誥

月光聽到笑迷迷

有時節大禾埕麼个也無

一個九十歲老伯婆

坐在屋簷脣看大禾埕

緊看緊大

緊看緊空

客語詩選

<想要摎你共下去看戲>葉莎

想要摎你共下去看戲

在紅燈籠高高掛起來个該日

天光就出門

看露水親像珍珠共樣靚餒餒

蜿蜒个小路頂

青草會在這兜个褲管寫詩

有時節也有早起个黃鶯

大聲扯開一日个序曲

聽講做个係一齣忠孝節義

行轉三國，讀英雄草莽个汗水摎目汁

曹操譙溪擊蛟，還有劉備躍馬過檀溪

就在咚咚滾个鑼鼓聲中

歷史个風雲又在這兜个眼前聚集

我當愛摎你共下去看戲

因為你會分我一支糖葫蘆

該糖蜜个甜滋滋摎山楂个酸丟丟

親像愛情个味緒