客語 愐起

愐起/陳寧貴

●原鄉

心肝肚總係囥等一個緊停動介秘密，像火焰虫个光眨動，緊尋前世个記憶，霧霧介意象乜像半夜突然現身个一群咳嗽，咳醒身體盡盡深肚，彎彎斡斡个桃花源，既經夢遺介另一个世界，流連在虛幻个神話肚，隔等一層放大个朦朧，檢查人世間个滄桑。

●墾丁

該年，吾陳氏開台祖碩仟公，同一群壯丁泅過會食人个黑水溝大風大浪，來到南台灣墾荒。用山歌做钁頭，用血汗來灌溉，用分恁辣日頭烤香个肌膚，築起做得簡單著腳个家園。用緊來緊烏金个面目，畫出南台灣个新地圖，現下我等既經變成南台灣歷史个紅尾伯勞，永遠毋再過境。