石跳仔

108年閩客語文學獎

客家語現代詩社會組

首獎作品「石跳仔」

作者陳美燕朗讀

一隻連一隻，像阿公阿婆彎彎个背囊，痀在水竇，老人家無講出嘴个痛惜，在這向輒輒吩咐，定定仔，細義行，堅耐个石牯，分𠊎細步細步徙到，平安个對向。

一隻連一隻，像爺娘打開燒暖个胸脯，坐在水竇，子女無注意个毋盼得，在這向恬恬期待，腳步正，莫停跎，定疊个基石，分𠊎一步一步𨃰到，順序个對向。

一隻連一隻，像先生弓等砸磳个肩頭，跍在水竇，學生體會毋著个心力，在這向再三叮嚀，心肝在，向前行，穩當个磐石，分𠊎大步大步行到，理想个對向。

無生溜苔个石跳仔，分恩俚跢核核，安全通過逐條，人生無共樣个坑壩，無求回報个石跳仔，也歡喜恩俚，再過踏轉，出發个對向。