叨位出問題？

鄧榮昆
遇著一隻蜂 （客家人試寫台語詩）



蜂是阮的好朋友

假使阮看袂到快樂的蜂

毋知阮閣會惦在地球生存偌久

一位物理學家講過：賰四冬 （註1）


因為農作物需要蜂來授粉

蜂無去啊，阮會失去青菜甲水果

三頓無法度從植物中吸收營養

開始出現一寡症頭


假使從阮的四箍輾轉

看袂到蜂

從彼一日開始

快樂的日子也袂真長

親像斷線的風吹

阮無法度掌握


□

掀開一大疊舊的新聞資料

二千○七年正月，治美國

人工飼的蜂一隻一隻過身

原因，無人知影


蜂無去啊，是驚人的代誌

有人講，蜂可能迷失方向

毋知路，死在荒郊野外

叨位出問題？甲阮逗陣遮呢久的蜂

會遇著遮呢大的風險？


如果是過身，阮會使看見屍體

無人看見蜂的屍體

這陣蜂到底飛到叨位去？


無偌久以前，深圳一个飼蜂的人

四十幾萬隻蜂一暗煞來死去八成

頭家欲哭無目屎。初步懷疑

是規陣的蜂在郊外採蜜的時陣中毒


毒予阮拍生驚

蜜的滋味袂堪得一擺的錯？


正當新聞記者前往採訪的時陣

還看見有一寡戇神戇神的蜂

飛在半空中，突然間一頭栽下來

一睏仔就袂震動了


□

你還會記得「小蜜蜂」這條囡仔歌

隨著音樂旋律，你還會曉唱？

想當年你頭一擺聽到這條歌的時陣

應該是五、六歲，抑是七歲？


如今，規日為著生活親像蜂仝款無閒

四界走傱。年歲越來越大

面對越來越少的蜂

閣再聽到這條囡仔歌的時陣

心肝內想到的是啥？


今年六月初，讀一本冊 （註2）

著一驚，假使人類突然間從地球消失

阮的世界會變成啥款？


假使人類消失，街仔路的大樓會崩去

庄跤的田地會回復到盤古開天的模樣

冷吱吱的城市因為阮的消失

虼蠽也會漸漸離開地球 （註3）

最後留落來的，是阮的怨嘆

甲阮的無奈？


□

你偌久無看見蜂惦在頭殼頂飛？

聽見蜂飛過耳空邊，沿路飛沿路唱歌？


註：1.亞伯‧愛因斯坦

2.《沒有我們的世界》（艾倫‧魏斯＼木馬文化）　

3.虼蠽：蟑螂。