雨佮戰鬥 胡長松
──獻予 G.K. 先生
「對你來講，雨是啥物？」伊是按呢問我的。
只是，這个熱--人的歙一直無離開，燒氣假若欲共彼堵白牆化做火灰〔hu〕，袂輸風吹過就會飄散去仝款。這个歙假若是宣佈雨無偌久就會來，毋過雨一直無來。彼幾隻顧監狗吐目雷，有夠毋知死活，攏毋知影伊羅光的計畫著欲成矣，閣按呢大細聲共阮phńg，哼，我看，怹的死期連鞭欲到矣。「這，叫做弓索。」羅光是按呢講的。哈，弓索？按怎看嘛毋是，干焦羅光這款陰奸佬仔出身的跤數想會出來。實在講伊羅光無該當佇遮的，伊這號kioh數，永過是某特務單位的大處長，無血無目屎的烏密婆，狗中狗，豹中豹，若毋是著報應予人「陷害」khok--入來，敢有人敢thih目gió--伊？閣敢按呢共伊拍共伊làm？我na想na愛笑。橫直，我相信hia狗最後會死甲足歹看就著。有一日雄雄地動，阮監房的土跤pit一紃長lò-lò，tsîng彼遍了，已經足久矣，羅光沓沓仔共內衫liah一條〔liâu〕仔一條布碎仔落來，閣共布碎仔囥佇兩个手婆中央lián，lián做一股一股，最後才共tsinn入去he土跤縫內面藏leh。羅光講he是弓，毋過直直毋共我講he布做的弓索終其尾欲按怎發揮，「總之他奶奶的你到時候就會知道了。嘿嘿！」關係弓索的一切，伊干焦按呢講。我看in彼號siùnn密婆的攏按呢，tènn神祕，不三時乾焦會曉嘿嘿嘿奸笑，腹內全是刣人放火的癩哥〔thái-ko〕物，橫直，陰奸佬仔就著啦。伊羅光就是按呢的人。其實啥物弓嘛比袂過我的武器，我想in是早就知矣，才會毋敢放我出去口面。我的彼个物，佇牆的外面，就佇海底礁石的岩孔裡，我無共別人講，有一个大物件藏佇這座海島監獄的底部的岩層，是我的同志囥入去的，位土跤底閣有一條長長的電線連接彼个岩孔內面的機關，只要共機關tshih落，嘿嘿……
http://taiwanliterature.ning.com/profiles/blogs/yu-ge-zhan-dou
0 Comments:
張貼留言
<< Home