濫濫莊

十八世紀初

我等離開貧苦介原鄉嘉應州

為了絡食，同阿爸阿母道別

留下目汁同越行越沈重介心事



渡海來台介時節

台南一帶已經有泉州漳州人開發仔

再也尋毋到著腳介地跡

我等祇有跈等

下淡水河一路南下

蓋像分麼介命運帶等

一步一介腳跡

慢慢仔行入荒涼介高屏平原

我等知得從今以後

客家山歌會適這響起

同原鄉介父老兄弟對唱



經過千辛萬苦

我等尋到一塊地來安頓自家

這下正有時間

偷偷仔整理痛苦介心事

恬恬去聽命運進行曲



這塊分我等生活介地跡

由於地勢低，一落雨

就氾濫成災泥漿亂竄

蓋像想愛將我等驅出這地跡

毋過我等介

硬頸精神毋會放過我等

我等一面唱山歌

一面將家園適泥漿底肚

撈起來