客语作品

阿公，你哪久轉來

由 邱一帆 在 2011 三月 7 的 11:54am 張貼

還記得六十年前个朝晨

你同阿婆講

愛去街路遶遶看看啊

該日生光半夜

你毋記得轉屋下

大家尋上尋下

看毋著若个身影

街路項个人講

當像你跈麼人出莊

一個月過忒

滿哪仔就尋你

你還係無轉來

屋家老嫩大細

有目汁噭到無目汁

歸隻年過忒

所有个親戚朋友

搭信還係音訊全無

希望个火種

漸漸仔變幼

該係做對年个時節

屋家人尋無若个烏身

尋無若个魂影

十過年過忒

逐日阿婆恬恬無講話

面無表情

閒來總係在屋簷下

坐在凳仔項

頭望望仔

望向禾埕大門後

轉屋家个路

六十年過忒

阿婆早就收起目汁

去天國遊覽

該日去街路

遶遶看看个阿公

毋知有同阿婆共下

在天頂看著

自家个子子孫孫

快樂生活無