客語詩展

●陳寧貴
戲


褪下社會小人物介身份地位

著起帝王戲服

佢介身影

一下間澎風起來囉



一手指天一手指地

盡像天地間介一切

都跪落佇佢腳下



看戲介人毋使偭忒多

大家共下坐尖來

歡歡喜喜欣賞

這大鑼大鼓炒作下介鬧熱



看到裡尾

看戲介人同做戲介人

共下流目汁共下笑翻天

戲做束大家拍拍勢窟

趕遽轉去



這時節恁氣派介帝王

褪下蟠龍戲服

縮歸小人物介真身

天光日繼續為下一餐飯打拚



●洗 面 記



該日朝晨

佢捧出一盆水準備洗面

一犁頭

沒愐到一下間

佢介面

跌落面盆肚勒



啊 !

佢大聲喊出來

佢看到佢介面

佇水肚搖搖晃晃

漸漸擴大 漸漸碎去



佢趕緊伸手去撈

撈起來係佢 從來無識介面

一陣寒意浸入佢 心肝底肚



這時節

佢又趕緊將面盆水潑向禾埕

佢詳細尋歸朝晨

到裡尾麼介都沒尋到

佢不安問自家:

我熟識介面去奈位耶？



●發夢還佇田坵挲草

--- 向勤勞堅毅日夜不息，默默奉獻維繫家庭的客家婦女致敬，

她們夜合花般，在人們未見處依然浮動暗香，芬芳了整個客家家族。



臨暗，日頭懶懶

跌落西片無麼該氣猛介檳榔樹頂

這時節我等十過儕細孲仔

佇禾埕盡暢搞聊

同時等待去田坵挲草一下晝介

阿母同叔伯母歸屋家



阿漢搞到一身大汗講

我阿母戴介笠麻

索仔鬆忒哩喲

風會吹入佢頭那底背

阿豐緊透大氣笑嘻嘻講

恁樣毋係較涼哈



突然糊糊介泥色人影遠遠出現

阿錦大蛤蟆胲喊

汝看汝看

佢等歸來也



行最前面係阿漢介阿母

行路像鵝仔有息把一拐一拐

我看到阿母

用笠麻向我等緊迓

我等像禾嗶仔嘰嘰喳喳

趕遽泄過去



佢等手項都有一大紮蕃薯葉

我等接過來

又趕遽搞生趣樣仔

泄歸各人屋家



歸屋家介阿母先洗好手面

燃時，起火暖燒水洗米煮飯炒菜

將一家大小安頓好

已經滿天星斗

月光一禾埕



食飽飯

各家大小端凳出來禾埕講趣妙

阿母恬恬搖等紙扇

涼風中遂點頭啄咕

這時節介阿母，會毋會發夢

夢到自家還佇田坵挲草------？



●欲落山介日頭



一群霸道介公共汽車

無愐到一下間

全部衝入下晝五點半


尖在汽車底肚介人

差毋多欲尖出油咧


另一方面

佢等恬恬將歸家介心情

磨成箭

遽遽射歸老婆子女介等待中

這時節 臨暗介日頭

偷偷適汽車介窗仔尖入去


汝看！汝看！

一粒粒介頭那

蓋像一粒粒

欲落山介日頭