頭擺

愐起頭擺

透早

雞公仔就煞猛撲翼

喔喔喊

天光了！天光了！

冷冷肅肅介大夥房 

一下間蓋像適發夢中

驚醒過來

阿姆最先起﹝hong﹞床

撞屐屎、起火、煮飯、炒菜

煎一粒盡香介雞春

愛分我帶飯包

昨暗晡我同阿姆講

愛較早喊我起床讀書

今晡日學校要考試

我揉目珠醒來

面吂﹝mongˇ﹞洗就先大聲背ABC

再背舉頭望明月低頭思故鄉

讀毋過半點鐘

就去屋背小圳溝

看細魚仔煞力 ku 向頂項泅

心肚愐

該頭那禿毛介先生

毋知會出麼該 ou-sia-ba 介考題

朝晨六點半

肚司放滿阿姆煮介飯菜

我騎等 lo lo ko ko

一路咿咿阿阿介自轉車

同我吹走聲介嗶嗶仔

共下去學校考大試咧-----