南都月光暝

台語詩
－南都月光暝
⊙陳金順

一陣涼風吹微微　傳送花芳味

府城古意滿街市　四邊好景緻

歡喜相逢牽情絲　難分又難離

你我今夜糖蜜甜　快樂月光暝

雙人相愛情綿綿　天星閃閃熾

赤崁樓前吟歌詩　浪漫真善美

牽手行過下願池　望天來保庇

你我今夜糖蜜甜　逍遙月光暝

三聲無奈心淒淒　出外拚志氣

台南車站驪歌起　鳳凰花當開

思慕愛人病相思　暗暗珠淚滴

你我昔日糖蜜甜　懷念月光暝

四欉老樹葉青青　想起彼當時

安平港口長流水　浪子回鄉里

有情有義有春天　再會運河墘

你我今夜糖蜜甜　真情月光暝

●後記：這首歌詞由簡上仁老師作曲，
曾於國立台灣文學館和鹽水台灣詩路演出。