母親（阿姆）

●發夢還佇田坵挲草介阿姆
臨暗，日頭懶懶
跌落西片無麼該氣猛介檳榔樹頂
這時節我等十過儕細孲仔
佇禾埕盡暢搞聊
同時等待去田坵挲草一下晝介
阿母同叔伯母歸屋家

阿漢搞到一身大汗講
我阿母戴介笠麻
索仔鬆忒哩喲
風會吹入佢頭那底背
阿豐緊透大氣笑嘻嘻講
恁樣毋係較涼哈

突然糊糊介泥色人影遠遠出現
阿錦大蛤蟆胲喊
汝看汝看
佢等歸來也

行最前面係阿漢介阿母
行路像鵝仔有息把一拐一拐
我看到阿母
用笠麻向我等緊迓
我等像禾嗶仔嘰嘰喳喳
趕遽泄過去

佢等手項都有一大紮蕃薯葉
我等接過來
又趕遽搞生趣樣仔
泄歸各人屋家

歸屋家介阿母先洗好手面
燃時，起火暖燒水洗米煮飯炒菜
將一家大小安頓好
已經滿天星斗
月光一禾埕

食飽飯
各家大小端凳出來禾埕講趣妙
阿母恬恬搖等檳榔扇
涼風中遂點頭啄咕
這時節介阿母，會毋會發夢
夢到自家還佇田坵挲草------？