客語詩選

杜潘芳格客語詩選

●有光在該位个時節     

在該位有光

看到光

黏皮﹝立刻﹞心就

歡喜快樂有希望

光 實在係好个東西

有光在該位个時節

有希望 有喜樂 有安慰

我愛做最先去點光个人

我因為愛點光

比麼儕都遽去

走上走下忙忙碌碌

●聲音  

毋知哪時，

單淨自家使得聽到个細細聲音，

該聲音鎖兜絚-絚-絚。

跈該時開始，

語言尋毋到出路。

這下，孤使得等待新个聲音，

一日，又一日，

嚴肅忍耐等待下去。

●紙人           

大地項滿哪都係紙人

秋風一吹啊來，搖過來搖過去。

我毋係紙人，

因為，我个身體斯係器皿，

我个心斯係神个殿。

我个頭那淰淰係天賜个靈感。

我有力量，我有能力。

紙人充滿了台灣島項，

我尋，我哪位都去尋，

像我共款个真人。

●平安戲        

年年都係太平年

年年都作平安戲

就曉得順從个平安人，

就曉得忍耐个平安人，

圍緊戲棚下，看平安戲。

該係你兜儕肯佢作个呵！

儘多儘多个平安人

情願嚙菜餔根

嗑甘蔗含李仔鹼。

保持一條佢个老命

看，平安戲

客語詩選

<子哀情>           黃碧清

掖蔴掖米个微毛末節

搭搭跌在鑊頭肚煎煎炒炒

一盤酸甜苦澀个人生味緒

無閒洎杈个日仔，極樂仔捩捩轉

心事像蚊仔在頭拿頂蠭蠭飛

悿，在燒熝个馬膠路項跳上跌落

轉屋家，分心情尞一下仔

凴在阿姆个眠床脣

熟識个圓身香味停在鼻公頂

目珠皮緊來緊重，緊重

溫溫仔个燒暖輕輕仔在

頭那項挲來挲去

細時節个思念，轉到夢裡肚

耳公脣行過輕輕个嗽聲

毋係夢，係阿姆寫淰愛个一雙手

這雙手，捽忒我歸身个愁慮

這雙手，挲勻吾無安樂个心情

我心肝定疊咧

睡在阿姆彎彎个手臂

覆在阿姆軟軟个胸前

聽著阿姆輕輕个敨氣聲

擘開目

看著阿姆像月光色目个頭那毛

我忍毋核个目汁像雨線

阿姆，吾个寶

--------------------------------------------------

〈難得老身-掛紙〉　／艾琳娜

挨過寒露食過冬節

難得這身老皮囊

八九十還係爺娘子

掛紙一年正一擺

一年無行兩年難再

相見猶似牛郎摎織女

恁憨兄弟無想長

今日毋來哪時來

過忒今朝愛等來年

一年容易又一年

風中个蠟燭啊　又驚怕

黃泥面頂年年花開

共姓有人

但不見舊人在

〈過年〉　劉正偉
　　
逐隻年前，包袱仔簡單撿撿揫
就轉去苗栗獅潭山肚个老屋
年三十⯭手拼掃，該下晝就開始拜喏
年下時異寒个日仔總算過忒欸
鄉下个日頭絲照來，異燒煖
　　
三四個細孲仔在屋脣搞紙炮仔
嘖嘖啐啐，歸日仔全毋會悿
過年，婦人家做上做下異無閒
男仔人大部分做佢相召賭徼
麻雀四色牌，至少愛三四圈
婦人家盡丁，還愛煎甜粄煮點心
　　
街路項，平常無麼个有人行
年節，後生人摎細人仔就變多咧
全部係轉莊項老屋過年節个
就這央時，客家莊正有鬧熱个樣仔

●外籍心舅﹝外籍媳婦﹞   /陳寧貴

有一個客家庄

蓋多後生討外籍新娘

客家庄就恁樣分人笑做聯合國

毋過隔壁介老伯母

下把﹝有時候﹞會同別儕

噥﹝抱怨﹞伊介外籍心舅

真夭壽喔一大早就罵我高毛人﹝壞蛋﹞

到裡尾有毋驚死介人

出頭為老伯母打抱不平

就去同這忒超過介外籍心舅講

汝仰會同大人儕恁無禮貌呢

毋驚分雷公槓死嘎

外籍心舅回話

我仰敢對大人儕恁無禮貌

我朝晨頭同我介家娘講介係

good morning 啊

老伯母這下正知誤會一場

毋過伊還係愐毋解

世上仰會有恁壞聽介話

恁早就講恁早

仰會講著變做高毛人