山歌

●山歌

阿旺伯今年八十三

毋愛看電視底肚介英雄撮把戲

佢暗晡頭食飽

就一個人恬恬兜凳坐在大禾埕

邀天頂月光同自己介影子

共下据弦唱山歌

阿旺伯介山歌

唱出一肚腸又一肚腸

頭擺彎彎曲曲介故事

穿過家家戶戶介門窗

尖入大人細人介耳公

●大河壩

聽講西北橋底下介大河壩
有蓋多金鬧鬧大鯉嘛
介下晝日頭辣到會刺人
偷睞到阿姆佇介睡當晝
我遽遽去尋阿漢頭阿耀牯
去大河壩漞水捉大鯉嘛

河水又鮮又冰
欲尖入肉底背樣仔
我同佢等大喊大笑
潑出歡歡喜喜介水花
突然一群大鯉嘛
對身邊泅來
蓋像想同我等共下搞生趣
阿耀牯譁聊去捉佢等
沒捉到反倒吃到好幾口水

目珠金金看大鯉嘛-----
泅入，我等四十多年前
童年心肚介大河壩