母語寫作是一種反省 / 陳秋白

佇台灣文學的路途頂面，我看著一群人，亻因對早期的華語寫作，慢慢遷到母語寫作的戰場。共母語寫作形容做是上戰場，這是對現有語文體制的反抗，也是對過去難堪的殖民歷史背景佮獨裁政治壓制的反省。

反省毋是否定過去前輩者，亻因佇台灣文學的冊架頂，辛苦使用母語佮華語建立起來的文本佮豐富資源。反省是一種體認，這種體認著是，當使用的語言無法度形成文本流傳落去的時陣，最後這个語言，著會因為同化佮錯誤的政治使弄，予人掃入墳墓，消失佇歷史的煙塵中。

佇母語寫作的路途頂面，我讀著同仁初初用母語寫的詩，比評較早用華語寫的詩，有完全無仝的心境佮內容。這是啥物道理？這是一項值得逐家去討論的課題。

佇任何時代，佮別人發無仝的聲，會予人排斥，做無仝的工作，無法度上台。有人講，寫母語文學，逐家攏讀無，讀無的文章是欲安怎流傳。這種講法真簡單點出二件代誌，第一、這毋是公平的國家，第二、就是你要去追求公平。

你無共家己的母語寫做文本，著永遠無機會，是鑽石永遠攏是鑽石，絕對未變做磚仔角。