十二婆姐 / 江嵐

在迎神个陣頭肚項
遠遠就看到十二婆姐
搖一路過來
歸陣仔啾紅个打扮
係特別饗﹝siang_﹞人个風景
逐儕就著紅衫紅裙
肩頭加等繡花个披肩
手項擎等水紅色个扇仔
又擎一枝大紅色个遮仔
戴等無共樣个面殼仔

總管陳靖姑會佬人收驚起乩
五宮陸九娘盡靚又盡慶
十二宮彭英娘係盡老个婆姐婆
婆姐子捩捩轉歸路尋阿姆
走來走去掀婆姐个衫尋奶食
婆姐个扇仔打落去就講
捱毋係若姆

揇細人仔个婦人家
在十二婆姐个遮仔下
鑽過來鑽過去
分婆姐挲一下惜一下
大人消災解厄
細人乖乖會大

十二婆姐
專門保護婦人家
同細人仔
保庇大家平安健康食百二