任人去講也清香

桂樹開花滿園香，
菊花開在桂花旁；
哥係桂花妹係菊，
任人去講也清香。

●

風吹門板兩邊開，
講過愛來就愛來；
燈草架橋你要過，
竹葉撐船你要來。

●

入山看見
藤纏樹，
出山看見
樹纏藤；
樹死藤生
纏到死，
藤死樹生
死也纏。

牛眼打花
花串花，
郎就堵水
妹踏車，
車軸聲聲
龍骨動，
引來清水
響嘩嘩。

●

送郎送到門檻下，
包袱遮仔妹來拿；

十日半月要來信，
三年兩載要回家。

送郎送到大門前，
看到烏雲在半天；

保佑上天落大水，
留轉捱郎嬲一天。

送郎送到五里亭，
再送五里難捨情；

再送五里情難捨，
分離難捨有情人。

送郎走了轉回家，
踏入間門正知差；

對著杉褲看一看，
目汁雙流到領下。

●

男：講起山歌我最多，屋家放有幾十籮；

拿出一籮同妹唱，唱到阿妹做外婆。

女：講起山歌我最多，我个山歌唔使籮；

我个山歌隨口出，唱到阿哥背駝駝。

男：唱歌莫唱相罵歌，罵人山歌麼人無；

相罵山歌拿來唱，妳來嫁我做老婆。

女：唱歌莫唱相罵歌，你敢唱來我敢和；

罵人山歌再來唱，你做公來我做婆。