邱一帆 / 紙人同真人

------------------
客語詩賞析 / 邱一帆
------------------
紙人
◎杜潘芳格

地上到處都係 紙人
秋風一吹來，搖過來搖過去
𠊎
我 毋係紙人
因為，我个 身體就係器皿，
𠊎我个心就係神个殿
𠊎我个心交托分上帝
𠊎我个頭腦充滿了天賜个啟示。
𠊎我有力量，有能力

紙人充滿了台灣島上
𠊎尋，到處去尋
像共樣 个真人

──原載1992，4月《客家雜誌》第23期。收入杜潘芳格（1993）《青鳳蘭波》頁89-90。台北市：前衛出版社。編入國語會（2008）《台灣客家語朗讀文章選集》頁102。臺北市：教育部。




●賞析
紙人同真人

這首杜潘芳格个詩，點出了佇台灣个土地上，至少在該央時，滿奈就係紙人，紙人同真人盡無共樣：紙人，雖然有肉身、會透氣，但係確確實實無心無肝、無思想無靈魂、無上帝無天賜个人；真人，不單只有肉身、會透氣，還係有心有肝、有思想有靈魂、有上帝有天賜个人。真人，係詩人个本質，本質也可能變質，故所以真人也係詩人一生人个理想、追求。
詩作一開始就寫著，在臺灣个土地上，滿奈（到處）就係紙人，紙人隨風搖來擺去，就像禾桿（稻草）人，也像圍牆頂高生出來个野草（牆頭草），悲涼个秋風吹來更加顯出做為紙人个悲哀。
第三句開始，詩人黏皮（馬上）交代自家並毋係紙人，因為詩人个身體就係奉獻上帝个器皿、心肝就係神殿、真心交分上帝、頭腦充滿上帝賜予个啟示，這表示詩人个身、心、靈係合一个：頭腦指揮个、心肝想个、身體手腳所做个係共樣毋會爭差（差別）个，這所產生个正係真正个力量、真正个能力，無像紙人無心無力，隨風搖擺。
尾項算來第三句，詩人又再次提著台灣島上充滿了紙人，可見，相對來講，在詩人个心肝肚，台灣島項（上）个真人係當（很）少个，就算當少，詩人還係愛去尋、奈位就去尋，像詩人共樣个真人。
讀了這首詩仔，分我異（很）多感受、感想同聯想：輒常（時常），我會問自家係毋係有真心對待自家、對待別人，無半滴花假？係毋係一點忠心面對自家个工作、面對自家个良心，毋會分（給）狗食忒（吃掉）？係毋係有堅持行自家母語文學創作之路，毋會打爽時間、怨怪讀者，持續寫出自家个感動……？知得仰般（怎麼）反省又會檢討自家、調整自家、朝既定理想前進个人，離紙人較遠，離真人較近！
打開電視，看著當多个政治人物、聽著當多佢兜个言論，頭尾落毋著，真假分毋清，話講起來毋會歹勢也毋會面紅，時常還「見笑轉生氣」，實在毋知見笑也無人教招（教育）！這兜政治人物，單淨為著愛維護個人个利益、政黨个利益，無心無肝也做得，佢這兜（他們），算毋算係一種無靈魂、無理想个紙人？
分媒體唆弄、政客制約个大眾，失去了理性思辯个能力，總知「核卵跈脧碰」，無搞清楚烏白、事實真相，人講佢（他）就行，人喊佢就做，無理性个激情，歇斯底里个行為，佢這兜，係毋係算係一種紙人？
還有在杜潘芳格＜平安戲＞詩肚，只曉得忍耐、順從、保存一條老命、食山楂糖个人；毋知愛（要）獨立自主、愛反抗不公不義个平安人，這兜（這些）人，係毋係另外一種紙人……？
恁樣（這樣）看來，在恩俚（我們）生長个台灣，真人無較多，紙人緊（越）來緊（越）多，想愛尋一個真人就無恁簡單！毋過，還係愛期待，自家做一個真人，一個身心靈合一、有堅持有理想个真台灣人。
--------------
●邱一帆 小名:阿帆(番)牯，南庄鄉小南埔人，現在住在南庄鄉東村，現任南庄國民小學教師，是充滿理想與熱情的客家詩壇新銳。