羅秀玲客語作品

《蘭軒小築》
http://hakkatl.fhl.net/Lanhien/Lanhien18.html
童年記事
羅秀玲

這下ke日頭花仔个光線會被外背箭入來，會瞠人目珠，ngài長透用細鏡仔來照對門阿復舅姆ke細人仔，mò幾久，佢會走出來尋：「奈隻山狗仔，將把恁樣來搞。」

林屋夥房ke阿雷伯逐日下晝會對這頭前過，佢行路就會發出「咳－－咳－－咳」嗽幾下聲，在恬靜ke睡當晝ke路項特別醒眼，其性格又當古怪， 腳氣雖然硬kau了，但he罵人還he夾夾滾，又會眼視視仔看等ngài兜，ngài兜都在背後笑「怪老人」。

阿慶嫂he賣千層菜ke，銷路蓋好，輒輒有外地人同佢掇貨。Ngài成時走入灶下偷食麻仔，食啊嘴項都he麻仔香。再過側簷he阿翔哥ke屋家，日時頭，後門都mò栓，會pun4共房ke叔伯兄弟來行細路仔，經過厥屋家透大路。

這條細路仔，乜he ngài ke「走命路線」，因為捱了阿姆逐擺發譴用袪把鬚修ngài，ngài定著會對這位走一路piang，轉角該位有柙水仔，熱天時節ngài輒輒在該片搞水，緊khim水就會走出來，有擺khim忒大力了，續斷截兩半，害阿得伯母好久mò水好洗衫服。

庄尾這段仔在做麻膠路，日頭炣啊燒氣過較熱，烈到像火共樣，歸身仔熱啊汗流脈落。

「對後門出來啊！知啦！」阿興探頭講。

「阿杰佢等等蓋久了！在做路咩，你俟mò眼珠喔！」還過吾姆頭到正睡，mò ngài仰仔出來呢！」

「來去頭前溪好了！該邊草場崗做得放紙鷂仔，也做得搞走相逐。」

到了該位，有一頭牛仔在該食草，牛仔蓋像覺著反躁，烏蠅在其身項粘收收，尾緊拂來拂去，阿杰看到了也學牛仔ke動作，屎窟搖來搖去，該樣勢衊到ngài兜笑到肚屎痛啊會死。

「異久mò來這料囉！透下新鮮空氣當好。」ngài講。

「噢！阿杰，今晡日ngài經過若夥房該鬧熱，歸屋人行入行出，mò閒直掣樣仔…你幐手若婆在間門唇thak麼个啊！」ngài講。

「He ngài細阿姨降賴仔啦！歸來屋家做月，吾婆講做月ke婦人家，門項oi掛抹草過長命草，用來避邪、趨煞，大人細子正會平安。」

「原來恁樣啊！」

「好啦！天時恁好，唱條山歌pûn你兜聽，mò收錢ke喔！」阿杰講。

後生認真老了閒山歌緊唱唱不完好的朋友交多少壞的朋友莫較贏

「Mò聲就mò聲，開聲就打罌，若山歌樣唱ke恁好啊！」ngài講。「你忘了厥公he山歌冠軍喔！著啊！Ngài仰mò想到，ngài也來唱一首。」阿斌興擳擳講。

你啊！貓公上樹，大家又he一陣朗朗滾ke笑聲。

臨暗ke風涼沁沁ke吹啊過來，歸身仔ke煩勞都mò了共樣，記得在陴塘捉禾花仔，記得在伯公樹下鬥大大尾ke塘皮la̍t，還有記得該驚驚險險ke探險，較大時節正知，鬼火he一種自然ke現象，人體底肚都有磷，故所人死忒會有磷化氫ke產生mò論日時頭抑he暗晡，只要光強，都做得看到鬼火。還有該殭屍，m̀過就he溼氣忒重正會恁樣，但he這兜經歷，在ngài心中，永遠he一個童年趣妙ke回憶。

------------
信心
羅秀玲

頭擺有ke人oi渡河，賢者比西那同上帝ke名仔寫在葉仔ke頂項，thak在這ke人ke褲帶仔，同佢叮嚀一句話：「Mò驚，單只oi有信心，就做得容易ke行在水面項，但he你假使對自家ke信心mô忒ke話，你就會沉死。」這個人果真容易ke行在水面項，突然，佢想看啊褲帶仔thak-è麼个，打開來看結果he一皮寫è上帝名仔ke葉仔。

「麼个嘛！」佢想：「m̀就he寫è上帝ke名定定咩！」疑狐ke心還在摶，mò幾久，佢就沉入去水底肚哩。



◎ 人生最大ke敵人he自家，缺乏信心就he失敗ke關鍵。