詩訊

2008台語文學選
總編輯：李勤岸
主編：周華斌‧陳正雄/詩
　　　陳豐惠‧廖瑞銘/散文
　　　胡長松‧陳金順/小說
入選作者 :
詩：方耀乾/李勤岸/周華斌/林文平/柯柏榮/陳正雄/陳金順/陳秋白/劉承賢
散文：林文平/王昭華/王貞文
小說：胡長松/陳雷/劉承賢

------------

泅出海翁之舞
--序《泅．海翁．舞：2008台語文學選》
李勤岸


年初2月才編好出版《2007台語文學選》，6月《2008台語文學選》koh編好，愛koh寫寫序矣。真正是「一頓久久，兩頓相抵」。毋是枵過饑無著漲kah強欲死。有影是典型ê散食人款式。台灣文學年度選有幾若个版本，一年一年一直出，算是富戶人。相對tik，台語文學選猶是一級貧戶。
咱《2007台語文學選》出版ê時已經是2009年2月，所以冊一出，人講已經過時矣。連冊店都無欲予咱上架。其實，台語文學可能毋是過時，予冊店躊躇ê，可能是傷早--時機猶未到咧!
無管如何，路是家己行! 咱《2008台語文學選》開始，閣共伊加號一个冊名，若是一本冊，應該著無過時無過時ê問題，敢毋是?
Ua̍t愈是時機猶未到，咱愈需要去開創時機，毋是候時機。毋去拚，毋去衝，時機袂uì天頂落落來。這是咱台語文學工作者心知肚明ê覺悟。
佇編輯會議ê時，大家做伙激頭殼，「腦力激盪」ê結果，《泅．海翁．舞》ê冊名著走出來矣。提議ê人無去解說《泅．海翁．舞》是啥物意思 (這是 brainstorm ê規則:無解說、無批評、無芳無臭、愈芳愈臭愈好)。
後--來有人講這本冊有可能會暢銷，因為愛泅水ê人會來買，愛海底動物ê人嘛會來買，欲學跳舞ê人嘛會來買。
愛文學ê人毋知會來買--袂?
是啦! 咱期待ê是愛文學ê人來讀咱ê冊，咱期待ê是愛台灣文學ê人來讀咱ê冊，咱期待ê是愛台灣ê人攏來讀咱ê冊。咱期待ê是--台灣人知影咱teh拚teh衝是咱欲泅出美麗ê海翁之舞!


雖然咱舊年組成ê編輯委員會有24个委員，分別是詩組8人、散文組8人、小說組8人。每年每組由2人輪值執編，按呢逐人攏每4年才會輪著一回，壓力袂講kài大。講是按呢，隨出一本年度選，問題就來矣。有ê委員開始欲辭矣。問題真實際: 大多數ê委員本身是作者，到底編輯ê作品欲選無，若是選，按呢會予人講話，講是球員兼裁判，講咱家己呵較袂臭火lo。規氣莫參加莫做委員無代誌。
若是驚人講話，逐家攏無愛做，大家辭辭掉，按呢今年年度選就散股矣!按呢無人來編年度選，啥物人ê作品會入選? 有人建議予無teh創作ê學者來編就好，毋閣按呢煞tshun 4个人，in 敢願意逐冬接tsiah-nih沈重ê工課? 何況，按呢嘛失去咱當初愛欲khoo大家做伙鬥陣同工，合齊團結，學習民主方式解決問題ê用心。咱台灣人逐家攏真gâu，毋過就是無才調合作，放尿攪沙袂做堆，予人看出出，特別是台語文運動內底閣較明顯。我這5冬轉來台灣，投入整合台語拼音，感慨特別深，真正凊心! 唉! 莫怪人共咱看破跤手，敢共台語檢定ê預算刪刪掉，閣進一步規劃欲共一節母語課除除去。咱若到今猶毋肯拍破家己、毋肯放棄自我來成全台語， 咱著已經看會著咱ê墓地矣! 語言運動假使若是做到變成符號運動，按呢已經是食著符仔，走火入魔矣!
我猶是希望台語人uì小組織開始學習民主ê生活方式，大家以開會、討論、參詳，決議來解決問題，並且學會曉無管決議是毋是合佇家己ê意思，攏去遵守決議，學會曉放棄家己ê意見，遵照共同ê意見。
佳哉咱年度選ê24个編輯委員有真好ê操練，真好ê討論，真好ê參詳，做出真好ê決議: 除了輪值ê執行編輯無選家己ê作品 (因為做一个編輯嘛真歹家己去講伊ê作品比別人ê較好)，其他ê編委會使推薦其他編委ê作品，不過攏愛佇作者迴避ê情形下討論、投票決定。佇這个決議下，今年有幾个編輯ê作品入選，嘛有編輯ê作品雖罔有予人推薦，結果無入選。不管如何，阮堅持只認作品無認人ê原則，作品若好就選。阮毋敢講無偏見抑是主觀，不過阮有勇氣接受批判。


今年年度選ê厚度差不多是舊年ê一半，這會使講是編選者ê嚴格，袂使講是2008年ê台語文學作品質量無夠。阮選入陳雷傑出ê長篇小說《鄉史補記》ê一章做代表，其實是選伊規本冊。這个時代對平埔族有認同ê台灣人，無讀過這本小說無算對平埔族ê認同有夠額。