面對－－碎裂之戰

面對 / 陳寧貴
－－碎裂之戰

夜
暗到同墨水共樣
我等蓋像佇墨水肚
恬恬緊泅

一隻一隻介猴仔、鳥仔
一頭一頭介樹仔
全部都睡落覺
連透氣聲也聽無到

我等輕手輕腳
慢慢慢慢摸到
中國海盜林道乾賊營前
囥佇榮榮樹叢
這時節，恨意
既經驚濤駭浪
湧入心肝底肚

我等正愛摸入賊營
無愐到該兜賊仔
蓋早得到攻擊消息

一大陣銃聲
打破分黑玻璃
蒙等介恬靜山林
黑玻璃突然
裂 ~開 ~四 ~散 ~
銃子像恁毒虎頭蜂穿入我等介
頭那
胸脯
肚司
手腳

我等介圓身
還赴毋到來喊痛
血，就火山爆發樣
噴到歸山林

日頭一出來
分人看到台灣
處處黏等血紅介歷史

●附記
1563年中國海盜林道乾，躲避朝廷追緝，率數百賊眾，
隱遁來台。他們任意劫虐打狗山西拉雅瑪卡道平埔族人，
卡道族人憤怒至極，商議多時，某夜，全體男女出動進行反擊－－