林櫻蕙客語作品

傳統客家菜


◎林櫻蕙

●之一 豬腸炒薑絲

冬妹伯婆 用
人生个艱苦
炒出
客家人
咬薑啜醋
開山打林
个
韌 性


客家精神
就在灶下 吂出桌个
馩馩香味
餳出
人客个口涎
展出
主人个沙鼻





●之二 食伯公福

辦桌食福
本本
菜就愛鹹，鹹篤篤个醬菜
正鹹仔出客家人个味緒；
湯就愛香，香馩馩个油氣
正會有分伯公福个豐沛；
肉就愛肥，肥滋滋个豬腳
正有分爐主款待个熱情。


桌項分福氣个鄰舍
使等筷仔
暢喋喋仔講：
「三斤豬肉毋當四兩鹽」、
「封雞封肉好名聲，毋當豬肉半肥腈」……

毋過，遂分
向土地伯公
合掌 跪拜 許福个
孫女愁慮：
冬妹伯婆个
康 健。



●之三 豬籠粄

神桌頂
得人惜个豬籠粄，
油濟濟仔 影出
正月半个大燈籠；
油蔥、蝦米、蘿蔔絲……
乜係冬妹伯婆
對神明个
承 蒙 敬 意。

毋過
孫女遂有自己个愐法：
為了營養康健
加入番瓜 染色，
為了好彩吉利
包出柿形 變化，
今下時行个網路
毋單淨配送客家粄食个 傳統，
乜分人帶來事事順利个 願望。