台灣母語動起來!

世界母語日，台灣母語動起來!

• 由 李勤岸 在 2010 二月 11 的 10:57am 張貼
• 發送訊息 檢視 李勤岸 的部落格

世界母語日，台灣母語動起來!

李勤岸

咱猶會記得，舊年世界母語日，是咱真痛心ê日子，因為母語日進前無幾工，台語檢定考試ê預算4000萬佇立法院被全數刪除。咱寫文章抗議無效，去立法院抗議無效，立委質詢無效，當面溝通嘛無效。佇台灣所有ê語言攏會當舉辦檢定考試，獨獨上大族群ê母語袂使，遮爾拗蠻ê行為會當發生，koh 咱完全無伊ê法，干焦一个原因，就是咱ê母語運動根本無實力，人根本無共你信táu!

台灣ê母語運動行到今仔日，應該是運動內面大團結，koh 進一步踏出來kap台灣人ê本土社團連結ê時陣矣! 母語團體，若是無法度串聯，顛倒佇遐觸來觸去，按呢ê母語運動嘛袂當得著台灣人ê認同，袂當得著本土社團ê聲援，咱ê運動suah永遠停留佇箍仔內，成做一堀死水。

佇世界母語日，台灣母語聯盟ê成立就是beh 改變這个現狀，beh結合台灣各母語社團ê力量，包括原住民語、客語kap台語等母語社團，進一步關切台灣ê公共議題，而且，針對各種違反母語平權、壓制母語生存空間ê事件，即時回應並採取行動，正面來宣揚聯合國教科文組織以及母語聯盟ê宗旨kap理想。

咱選佇221世界母語日來成立大會，是宣誓咱beh kap 全世界所有救存本土母語、愛護母語教育ê國家kap人民行鬥陣，做伙為維護人類母語文化ê資產來拍拚。

今年世界母語日，教育部siâng-sî 舉行「世界母語日，台灣動起來!」ê活動，頒發母語推行有功人員ê貢獻獎，頒發母語文學創作獎，koh 邀請各母語社團來排擔仔宣傳，算是相當用心。

啥物人是對母語推行有功ê人員? 啥物人有資格領母語貢獻獎?

論真來講，台灣ê本土母語推行到今，成果真有限。到今，母語教育猶是停留佇國小一節課ê階段，攏無進展;到今，母語支援教師佮在職教師ê檢定考試猶袂當全面實施，來提升母語教師ê教學水平;到今，台灣ê報紙猶袂當接受台語文書寫ê文章;到今，台語文若有羅馬字著予人講是「火星文」; 到今，台語文ê冊佇一般冊店猶看袂著。按呢ê母語推廣成就，敢有人有資格講伊有貢獻? 特別是長期以來，母語運動內部一直為拼音系統爭論不斷，甚至結成恩怨，致使運動無法度踏步向前。母語若beh 有法度推sak，愛予社會接受; beh予社會接受，一定愛標準化。只有佇教學上，佇書寫上愈一致，愈有可能標準化。愈標準化才愈有可能予社會接受，予社會接受，咱頂懸講ê遐ê制限，才有可能突破，母語存活ê局面才有可能拍開。敢可能是逐家愈堅持家己ê書寫系統，愈無整合，勢面會愈好? 這个道理敢無真簡單? 所以，有時我咧想，愈是佇檯面上ê頭人，顛倒是愈無貢獻ê人。顛倒是佇草根底層工作，恬恬照教育部公告ê方案佇推動母語ê人，才是真正對母語復振有貢獻ê人。