黃卓權《人間遊戲》序

詩遊人間、人間遊詩
──黃卓權《人間遊戲》序

●方耀乾

聽卓權老兄講其愛出詩集矣，實在著驚一下。幾只月前摎其共下打嘴鼓介時，才聽其講在介學寫客語詩，打算愛出一本詩集；厓還撈到其係搞笑罔講定定，無想到才無幾只月，其正經料理好勢，就愛兜出來請人客矣；看來也介「老貨仔」老罔老，手腳閣真遽。厓一本詩集就愛寫幾下年，慢慢仔硞、慢慢仔浸，正勉強浸出來。也介「老貨仔」一下仔就愛辦桌請人，實在無簡單，值得企直，撈其行禮。
等厓看著卓權兄用e-mail寄來介詩稿，才知這本《人間遊戲》係其幾十年來做「史人」介閒工，兼做「詩人」供出來的前人子。可見卓權兄當早就係一個「詩人史家」。想到這個銜頭，心肚暗暗著驚，實在係有眼無珠。厓頭擺目珠濛濛，撈其看到殕殕，失敬失敬。著驚罔著驚，老阿哥愛出版「下山」介詩集，嗯裡愛準作大事情來看待。其總係講自家係「寫搞介」，實在也有影，其也無烏白講，看其介序詩就講到盡清楚：「總係詩人才寫詩/世間就無生趣/假使寫詩像做戲/過日正有生趣/總講寫詩毋像詩/也又嘛當生趣」。毋過其係盡認真在介搞，盡誠意在介搞。厓認為做詩人介第一條件就係做人愛有疼惜介心，第二就係作品愛誠心誠意，第三才係文字運作撈思想。至少，卓權兄做人有疼惜心、係誠心誠意介。總講一句話，卓權兄介詩就係「搞」善，就係「搞」真，講起來其介詩嘛幾多，尤其係情詩。
《人間遊戲》這本詩集分做4輯：1. 客語詩、2. 仿古詩、3. 打油詩、4. 長短句。形式多元，有新詩、律詩、填詞、打油詩等等；「語言」亦多種，有現代客語、古漢語、現代華語。由此可見，卓權兄所搞介《人間遊戲》，毋會壓束到一定介框仔項，同時其係真心在介「搞」，搞出一種意境出來，這正係「遊戲」，嘛係「搞」介真意。
下背舉出幾首厓較合意介詩，撈大家分享（好詩、趣味詩還盡多，無法度逐首舉例）。首先係〈祖國〉，寫出台灣人「世界孤兒」介無奈（一家三代人，呆到共所在，三只國籍），同時也對台灣未來命運介關懷，恬恬流落極深介疼心，係一首反諷、批判，分人心酸介佳作：

父親留有一本泛黃的日記
首頁工整的寫著：
大日本帝國萬歲！
天皇陛下萬歲！

我也有一本泛黃的筆記
第一頁工整的筆錄：
中華民國萬歲！
蔣總統萬歲！

祖父生前最花心
少年寄情大清國
青年變心愛日本
老來跟人去愛大中國
他沒留日記 不知他怎麼喊萬歲？

如今父祖都去了天國
那裡都是萬歲
或許再過二、三十年
我去陪他們
一齊高呼：天國萬萬歲！

卓權兄介仿古詩〈生根〉幾有新意，顯出釘根台灣介意志，土斷介意識。假使對原鄉思思念念，當初嗯裡介來台祖又何必離開故鄉？係講土斷落籍台灣安到背祖，無成一千年前土斷落籍福建、廣東也係背祖？幾千年前土斷落籍中國中原也係背祖？幾十萬年前從非洲土斷落籍中國也係背祖？照嗯裡應該就愛轉去非洲認祖歸宗，祭拜祖公（猩猩、猿人、原人？）囉！撈介兜共同祖公講：不孝子孫轉來囉？
在〈生根〉肚項，嗯裡做得看出來台祖「開山打林」介艱辛，為到後代開闢新天地介胸懷：

橫舟強渡黑水溝，
立業開基不低頭；
從此蟠根誌風土，
誓將蓬島埋客愁。

鐵漢嘛有柔情，卓權兄介柔情毋係介種猛火式介，也毋係商業媒體包裝介愛情。嗯裡看這首用客語書寫介情詩〈有惜無惜汝盡知〉，就係真情實意介表現。

莫問厓有惜抑無惜
汝介心肚盡明白
厓早就將心肝挖忒
就等爾心入來

毋使山盟又海誓
毋使熱情像火燒
講一千句介綿綿情話
無當恬恬仔掛吊關懷

莫管花開又謝忒
莫問是非摎烏白
總愛真心相惜
仰做得用斗來量
用車來載

打油詩（doggerel）大體認為係較無文學價值介文學類型，是一種較凊彩，較欠內容、思想介押韻遊戲詩作。卓權兄介打油詩當然嘛有也種特色，係講失忒也介特色，仰會還像打油詩？比論講〈饅頭190〉書寫退伍190日前介心情，就係一首標準介打油詩：

莫管閒事莫理人，
終日昏昏醉夢間；
一朝夢中醉醒時，
昏昏已過數百天。

毋過卓權兄介打油詩，有兜係幾有深意介，就像這首〈真假〉：

酒後才有真話，
醉後才無虛假；
大醉渾沌一片，
醉醒舉步天涯！

總講一句，卓權兄這本《人間遊戲》有其可觀之處，值得嚴肅來看待，當然嘛有拉天、搞笑介特色，處處顯出自我摳洗、諷刺介趣味，做得分人用輕鬆介心情來閱讀。最後也係盡重要的，厓愛奉勸大家，遽遽翻過下一頁，開始看這本盡有趣味、盡有智慧、又盡有酒味的《人間遊戲》。

2009/08/30台南永康