星期二, 6月 29, 2010

共下來相和!

客語詩- 台灣和解 / 陳寧貴
多倫多228和平紀念會-甘訪英唸詩


食台灣米飲台灣水,

族群相惜像戽水上天,

恁樣介台灣人,

敢毋會壞勢?



離鄉不離腔,

我講客家話汝講河洛話,

佢講北京話抑係原住民話,

這全部都係台灣話。



有人講客家話有音無字,

仰會好愁毋愁,

愁六月天無日頭?

這係強勢語族介拗蠻,

事實客話有音乜有字,

汝寫「可以」我寫「做得」,

汝寫「對不對」我寫「著無著」,

「茄子」係「吊菜」,

「鋤頭」係「钁頭」。



問題佇這位:

我等有認同自家人無?

有心打石石成磚,

無心打井井無泉,

適今晡日開始,

大聲講客家話,

大膽寫客家文,

「蜻蜓」變「揚尾」,

「老鷹」變「鷂婆」,

承蒙台灣逐儕人,

共下來相和!



註:

戽水上天:喻很困難

抑係:或是

乜:mei,也

我等:我們,亦寫成「我兜」

適:di,從

今晡日:今天

共下:一起

0 Comments:

張貼留言

<< Home