客家文藝

●張芳慈作品
　　甜粄味

　
　硬翹翹介甜粄

　　撮做籤

　　攤在禾埕方曬燥

　　食到八月半



　　逐擺過年

　　婦娘儕將自家

　　當作磨石

　　迷迷迴到三光半夜



　　甜粄介味緒

　　細細口緊食

　　阿姆介艱苦啊

　　映入做妹儕心肝肚

　　續無半屑甜味


●　利玉芳作品

　　嫁



　　耳環仔叮噹搖

　　在我介耳公邊講出嫁介心情

　　隻隻金指 含著傳統介情愛

　　首扼仔落在我介左右手

　　一圈一圈都係祝福

　　阿爸送我三從四德

　　阿姑包分我一句話

　　喚我莫忘祖宗言

　　雖然蒙等一層濛濛介面紗

　　我也讀得出

　　這本沉長介禮數



　　新娘車背響起嚴肅介落聲

　　我會珍惜潑出去介這碗水

　　紙扇輕輕跌落地

　　阿姆撿起搖清涼

　　自言自語唸四句

　　公婆相惜 早供賴賴