毋罅佢一管大銃

http://igonghak.blogspot.com/

又看到「吹三年个簫仔，毋罅佢一管大銃」
黃永達

4月23日行政院客家委員會辦理个[2011全國桐花祭]在苗栗舉辦開幕典禮，黃主委在開幕式中致開幕詞，除了「鄉親大家好」、「恁仔細」，全程用華語致詞。全國客家事務最高機關个最高政務官，佢續來無講客話。使了歸千萬个錢銀來辦桐花祭，還有逐年幾十億个預算來做客家，推廣客話原本係主要工作，大家乜做到汗流脈落，佢都恁重要个場合毋講客，「人吹三年个簫仔，毋罅佢一管大銃」。

4年前，行政院客委會一位高層，在客委會辦理个[客語生活學校成果觀摩賽]頒獎典禮中，佢摎大會主持人差不多全講華語，會後筆者就發表文章評論佢「人吹三年个簫仔，毋罅佢一管大銃」，意思係學校師生恁煞猛都該教學客話，盼望學生仔做得愛講客，毋過頒獎時節，這兜頭人華多客少个講話就打爛甕咧。在場恁多个學生仔、先生會仰般想？儘像主事者就認為「講客話‧做客家」係表演用个，毋係正式个生活語言，該恁樣「客語生活學校」係麼介東西？今晡日，這位主委在台頂毋講客，就係將把大家打拼母語个成果打橫到地泥。仰會又看到「人吹三年个簫仔，毋罅佢一管大銃」？

用華語都該大嬤聲牯喊要發揚「客家」，這係麼介東東？係使錢做表演，做名聲定定？也係原本就無打算真經做、誠心做，活動辦辦哪就好、補助分分哪就好？該恩裡大自家鼻孔摸摸下，也無麼介話好講，毋過心肝肚想到納稅人个艱苦錢、社會个期望，感覺到真經冤枉呵！

客委會主委毋講客，實在分人「匪夷所思」，敢係因為在座个總統聽毋識客，抑係想要分在場个這兜媒體歡喜？這兜媒體一直慣勢用華語霸凌閩客原語，主委驚佢兜？總統應當聽哎識，也應當儘鼓勵人講客呀，無佢學講客話係學假个？在台灣土地頂項，講歷史比華語較久个客話敢會過頭？根據政策施政做客家、推客話个主委在自家客委會所辦个活動中講客，這又敢會忒過頭？

---------
英文毋壁講係[奇恥大辱]，
毋曉母語該係麼介？
黃永達

逐年逐月就有TOEIC多益測驗舉辦，奈央時報名就做得，這係一種國際英文溝通能力个資格測驗，舊年3、4月个時節，該測驗機構有統計亞洲國家間个排名，台灣考生比輸日本、韓國等國，當時擔任行政院副院長个朱立倫講這係「奇恥大辱」，台北縣周縣長還要縣內學校加強英文教學摎上課時間。

英文能力毋好就怪教學時間毋罅，這係思考方向差大碼咧。大自家知，台灣學生仔從小學就有教，國中、高中英文課逐日就有，到大學還有大學英文，用力花時讀英文絕對毋輸該幾个國家，過講，台灣子弟其他各項表現也毋會輸人啊！恩裡從澳洲(英語國家)語言學者个一項研究就做得提供這个答案。該研究係對澳洲原住民─毛利人子弟个英文溝通能力做調查，得到个結果係，會毛利話个毛利子弟，佢兜个英文程度比毋會毛利話个毛利子弟強加儘多。

儘簡單个道理，從細就使用毛利母語祖宗言个子弟，所有家族、社區、生活个大細項事情，佢全參與得到，語言摎生活密切結合，佢當然從細就培養著語言个情感、歷史个情感、使用語言个能力(包括音調、語法、情緒、內涵)摎語言个精準性，佢要學英文，自然捉得到英文个情感，也曉得較精準來使用(講、聽、讀、寫)英文，因為語言溝通摎運用个原理係共樣个。換句話來講，講母語係從細培養語文能力个最好方法。這就說明了日本、韓國子弟仰般英文能力較好，因為佢兜个大細從學講話開始到大，從來就無離開母語祖宗言，佢做得從家族、屋肚、社區等生活中當實在个學習到、培養到語言个時空情感摎溝通能力，佢要學麼介其他語言就較遽體會、較遽上手，又做得到位。

另外一方面，講母語祖宗言係代表一儕人个自尊、自信、自重，係基本个做人道理，全世界無一个所在像台灣，朝野共下想要擲忒自家个祖宗言，全心學外背个語言─華語、英文，在專制中國各地區，「朝」推行普通話，「野」講地方語言，無論老嫩大細，先生走販，從細到老都講地方祖宗語言。恩裡選出來个大官啊大官！係講英文毋壁安著「奇恥大辱」，該毋曉母語又係麼介？英文輸人，母語祖宗言乜輸人，該又係麼介？