1895年 南台灣六堆保衛戰

● 陳寧貴
面對---臨暗
---1895六堆保衛戰
●

大風如弓，
暴雨像箭，
也不能射傷我等！
霹靂震天，
雷霆萬鈞，
也不能分我等變成
著驚縮翼个
大地飛鷹！

●1895六堆保衛戰

1895年11月11日
日本乃木中將个艦隊
像震天撼地雪亮之劍
刺入南台灣
日軍耀武揚威
對枋寮登陸後逼近下六根﹝今佳冬﹞
佢等貼出告示----
擎白旗迎皇軍者相安無事
反抗者誅殺至雞犬不留

這時節對台灣北片向南片
一路掃蕩而來个日軍
既經逼到高雄屏東一帶
佢等南北夾擊
準備一下手板就收服台灣全島

●西勢---忠義亭

南台灣六堆人民个緊急會議
在熱血中緊滾
主戰同主和个暗中拔扯
感性同理性个激烈交擊
火花四濺！

直透雲霄个聲音
驚天動地響起--
頭可斷！
血可流！
寸土不可失！

對陰暗中遲遲疑疑
驚驚縮縮个聲音也響起--
台灣大官人
既經全部遠走高飛
吾等勢單力薄
蓋像係用卵擊石

話一歇
群情像颳起一陣驚人个超級颱風
要將這閃閃爍爍
礙眼个燭光黏時
吹滅！

眾人尋出發言者
將佢捆綁在桌腳
大聲緊罵--
懦夫！
懦夫！
懦夫！
懦夫！
懦夫！
懦夫！

主和派到尾驚走
無過，這時節族群生死大戰像悶雷
正愛對天邊烏雲中
驚心滾動出來

●下六根---步月樓

日本將軍桑波田个目珠
既經跋上頭那頂項
緊愐緊偷謔
這下六根庄民
就愛歡天喜地來迎接
我這粒金鬧鬧个新日頭出現囉

轟！驚天大聲
發夢也無想到
一門古砲對前面衝出
像盡久無發威个雄獅
撲向愛來採收勝利甜果个日軍

佢个利爪向四片大力爪去
日軍一著驚
黏時變成天上飛个血肉
日軍因為人多勢眾整軍反擊
那門古砲一息也毋驚
共樣煞猛大麻聲緊咆緊哮
到尾實在毋堪高溫
自家爆炸壯烈成仁

這時節下六根義勇軍
既經將自家變成砲彈
向敵人圓身項緊擲﹝jet﹞
血肉蓋像大雨緊落
一下間大地種滿
保村護土个紅花
到裡尾因為寡不敵眾
只好像後方撤守----

●長興庄---火燒庄

譴到會死个桑波田
來到六堆最尾一塊防守地
也是抗日總指揮
大總理邱鳳揚故居---前堆長興庄

桑波田對屏東運來
烏麻麻蟻公樣仔个日軍同大炮
用三面鐵桶包圍方式
腥風血雨猛攻而來

長興庄跌入大火海
邱老總理在飛沙煙硝中
同烹煮人心个死亡戰鬥
佢滿面黑污一身都係塵土
作戰中一粒砲彈飛來
一雙手遽遽將佢推﹝sung﹞開
佢同死神擦身而過
毋過用手sung開佢个第三倈仔
續中彈倒地

看等到處噴濺个血
邱老總理既經赴毋及
阻擋湧到心肝个悲傷
只好將目汁
趨歸哀痛个心頭

這時節緊來緊多砲彈
發癲樣仔飛過來
義勇軍一個一個倒地
戰士到尾存無幾儕
毋過日軍還像破堤大水湧來
將全部長興庄淹忒

唉！長興庄！
我等深愛个恁靚个土地上
唯有忠義在火肚著到剝剝作響
肉身經過砲彈千焠百煉
昇華成忠義个圓身
像一面鮮紅个旗仔
在台灣歷史恁冷个泥灰肚
熱熱烈烈
昇起

●

1895年，台灣客家
用竹篙逗菜刀
加上硬頸精神
這時節，我等就準備行過
台灣歷史个大風大浪

到裡尾，留下肉身
分台灣大地做肥料
留下英魂，親像山櫻花
飄滿客家鄉土