星期日, 11月 15, 2015

第38屆吳三連獎頒獎人 宋澤萊先生致詞 逐字稿

【第38屆吳三連獎頒獎人 宋澤萊先生致詞 逐字稿】

時間:2015/11/13 下午
地點:台北國賓大飯店 吳三連獎贈獎典禮
19年前,有人共吳三連文學獎囥踮我的手頭頒獎予我,19年後,我閣將這个吳三連文學獎來頒予胡長松先生,已經過19年矣,時間過了足緊。頒這个獎,我有足濟話欲講,但是時間有限,阮限咧5分鐘內共話講了,所以我只好共我欲講的話寫佇紙內底唸一遍:

各位文藝界的有志、各位前輩,大家好,感謝逐家前來參加這次的盛會,這一次胡長松先生得獎,最大的意義,應該是吳三連文學獎拍破了慣例,共文學獎頒予用咱台灣話寫作的作家,所以我欲利用三、四分鐘的時間,鼓勵其他的文學獎來學習吳三連文學獎,勇敢共文學獎頒予咱用台灣話寫作的作家,特別是巫永福文學獎、賴和文學獎、佮牛津文學獎這三个文學獎。

咱台灣話的文學,自滿清的時陣就有囉,日本時代也有,到了戰後小可停20年,到70年代開始有人用台灣話寫詩,比如咱基金會內底的向陽先生,伊就用台灣話寫一本詩,伊確實是一个先知先覺者。美麗島事件了後,濟濟覺醒的台灣作家,感覺著無用台灣話寫作是真見笑的代誌,煞促成台灣話的文學大步前進,之後,大家真拍拚,佇無人鼓勵之下,奮鬥40年,到現在,已經出現二、三百个以上的作家,也出現了濟濟的刊物,像胡長松先生,現在手頭就掌握一个上大型的刊物,叫做《台文戰線》,干焦同仁就有四、五十个左右。

各位,現在台灣話的文學作品,已經濟到看袂了的地步,林央敏的一本小說已經達到50萬字(編按:正確應該是30萬字),胡長松先生的一本小說也來到30萬字,內容的深度超過了北京語的文學,咱台灣人已經創造一个新的文學國度,完全是台灣人聲音的國度,遐有台灣人真正的生活、真正的美感佮真正的思想佇內底,而毋是外來的,對咱台灣人來講,應該是非常值得驕傲的偉大事工,咱攏應該跳起來大聲歡喜,無奈台灣人猶毋知影這件代誌,各大文學獎的主辦單位,也無欲瞭解這件代誌,怹袂曉有計畫來鼓勵台灣話的作家,攏是經過予幾落十个北京語作家得獎了後,才有一个台灣話的作家意外得獎,甚至根本就無用台灣話的作家得獎,情形實在不可思議。愛知影,難道巫永福先生生前毋是用台灣話講話嗎?賴和毋是用台灣話講話嗎?馬偕難道佇台灣傳教咧講英語嗎?伊毋是咧講台灣話嗎?為怎樣怹的文學獎毋頒予台灣話寫作的人呢?由這點看起來,吳三連文學獎是非常先進的,甚至比國家文藝獎閣較先進,佇逐家攏無注意的時陣,已經共獎頒予台灣話的作家,真是了不起的獎!我欲代表用台灣話寫作的作家,向吳三連老先生說一句多謝!你是偉大的台灣人!

我也希望胡長松先生會當藉著得著吳三連文學獎的這个光榮,通率領更加濟台灣話作家向前行,寫出更加濟感動人的作品,予咱台灣人的文學,更加有力,更加豐沛,感謝各位!


莊華堂 shared Tiong-siong Oo's post.

宋澤萊先生在國賓飯店2樓的頒獎談話
我人就在會場,就現場直覺
那是一場痛快淋漓的震撼教育
當天包括吳樹民董事長在內的
總共9個頒獎、得獎人的致詞
只有宋先生中途為掌聲掩蓋
致詞完也得到全場最熱烈而持久的掌聲
我認為宋澤萊那五分鐘的話
是台語文學已經逐漸攀登到峰頂之際
台灣文壇的學者、作家、編輯和讀者群
仍然處於神經末梢痲痺之際
母語文學長期受到文壇冷落的乾旱季節
下了一場鋪天蓋地的即時雨
這是一篇台灣母語文學史上極重要的宣言!

1 Comments:

At 3:12 上午, Blogger 陳寧貴詩人坊 said...

【第38屆吳三連獎文學獎 胡長松 得獎感言】
真榮幸得著吳三連文學獎的鼓勵,心內非常感激。
我一直相信,全世界上好的文藝作品,攏是對各族群的文化、歷史、風土、語言的肥底發穎,台灣社會因為過去文化政策佮語言文學教育的偏差,戰後的台語文學會使講完全無發展的空間,甚至捌完全停止真濟年。雖然1970年代開始有少數台語詩重頭茁芽,毋過大規模有意識的台語書寫,愛到1987年前後才開始形成運動。一直到現此時,台灣已經出現袂少優秀閣拍拚的台語作家,只是因為環境的先天不良,台語文學的寫作猶是非常辛苦,會使講是佇完全無出版市場的弱勢條件裡寫作,這猶原是一个真大的危機。
這回我用五本台語小說參加甄選,就是代表這群辛苦弱勢的台語寫作者來參加這个獎,希望逐家重視這个危機。我的小說本身是我對我的族群母土佮母語的感情,嘛是我對這个族群優美的語言的行禮,這回有機會佮真濟優秀的華語作家作品相比並,最後得著評審團的鼓勵佮肯定,內心感覺無比的光榮、感謝佮激動。我相信,對台灣的本土母語文學來講,這是一个好的訊號,向望本土母語文學會愈來愈受著文學界佮社會大眾的理解佮重視,嘛向望會使有閣較濟本土母語的作家受著各重要的文學獎注意。
台語文學經過濟濟前輩佮友志拍拚幾十年,到今已經粒積真濟優秀的作品,我希望逐家瞭解,我真幸運,我只是怹所牽教的其中一个。所以,我第一愛對自早前到今的濟濟充滿智慧佮勇氣的前輩佮友志,表達我上深的感謝佮敬意。
現此時,台語寫作的工具已經齊備,我嘛欲邀請逐家來讀台語文學,來寫台語文學。我真期待佇有志的共同拍拚之下,台語的文藝會使得著閣較濟人的投入,嘛向望政治、教育、文藝、影視、翻譯等各界的專家,合作佮分工,予台灣開出更加美麗的文藝花蕊,嘛予台灣人佇本土母語文藝的內面,活出自信、美感佮尊嚴,予咱的靈魂佮精神,成成實實出頭天。
最後,特別感謝我厝裡的人,尤其是我的爸母佮牽手久年來對我的栽培佮支持。感謝前衛出版社佇我寫作出版的過程一路幫贊。感謝《台文戰線》雜誌社的友志扶持。感謝每一个讀者佮朋友對我的鼓勵。若無恁,我無法度得著這个獎。一切的榮耀攏歸佇上帝。多謝

 

張貼留言

<< Home