星期二, 2月 16, 2016

104 年教育部閩客語文學獎得獎名單

104 年教育部閩客語文學獎得獎名單
http://ws.moe.edu.tw/001/Upload/6/relfile/7842/45571/0be09485-56c5-4bfc-8c20-3ecb8e1d98b5.pdf

posted by 陳寧貴詩人坊 @ 2:46 上午   1 comments

1 Comments:

At 10:14 上午, Blogger 陳寧貴詩人坊 said...

豐湃多彩个客語現代詩

●教師組
1 種 — 寫分高雄氣爆受難家屬
這首客語現代詩盡有創意，一開頭恁樣寫 ---「揀起一皮焦黃个葉仔/ 在烈火燒過/ 熰火冷泧以後/ 夾在賁賁字典第七百三十一頁當中/ 密密幼幼个字是大大細細个沙石」--- 無論文字運用抑係氣韻，一下間吸等讀者目珠，事件雖然過去一段時間，共樣分人心肝頭忍毋核个感傷 。 第二小段 --- 「毋知幾久 /上心个葉仔又係一片青里里 /毋知奈時/ 晁晁个樹尾又綻出嫩息息个芽苗」----寫出盡大盼望，最尾講---「種落相思个樹/ 結出苦楝仔籽/ 華華个月光又會照耀四方 /晟眼个春光日又會轉到人間」-----這係這首客語詩《種》畫龍點睛个主題，對事件深沉犀利觀察，書寫个形式表現盡有現代感，內容提出新境界。

2 爾有聽到花開个聲音無
這首詩開頭就恁樣問：「爾有聽到花開个聲音無？」分人感覺淰淰个詩意，第一段問企到該田中央个農夫阿伯，農夫阿伯講：「無！無聽到花開个聲音！
斯有落雨个聲音，落到田肚个聲音，還有心肝肚歡喜靂天个聲音。」寫出農夫阿伯心肝肚真實个聲音，佢聽落雨个聲音，贏過聽到花開个聲音。第二段寫愐到阿姆輕輕安睡目个聲音：「像油桐花開个聲音，輕輕个，軟軟个，柔柔个，緩緩个，聲音恬恬行到身邊。」係盡登珍个描寫。第三段遂等﹝接著﹞第二段寫愐到阿姆油桐花開樣透氣聲，問自家有聽到花開个聲音無，摸等个心輕輕回講：「有！」佢又輕輕个問：「有鼻到該香緒無？」這時節作者既經聽到花開聲僇鼻到花香味緒，毋故「花開个聲音奈時又渡走春天咧啊？」懷念起阿姆又一陣感傷。本詩書寫有新意，第二段同第三段意象較統一，感動讀者心神。另：鋤頭係钁
頭毋係鑊頭 。

3 阿姆个聲
這首客語詩用阿姆个聲音來懷念阿姆，係盡有創意，過再將阿姆个聲音詳細分：「軟軟 、尖尖、 扁扁 、 彎彎」乜盡有特殊性。 麼个係阿姆个軟軟聲音？原來係還細時節：「阿姆个聲 ，軟軟，揞呀揞， 拍呀拍 ， 軟軟个聲就像會拐人樣仔，目珠跈等就眨下來，佢軟軟甜甜」，讀來燒暖動人。麼个係阿姆个尖尖聲音？該下係用來嚇賊。麼个係阿姆个扁扁聲音：「阿姆个聲音 ，扁扁，阿爸半夜正轉屋，間房肚兩儕冤家，扁扁个聲在門縫項鑽出來 」，盡有想像力同趣味性。麼个係阿姆个彎彎聲音：「不管路行幾久 ， 離家幾遠 ，耳公脣就係有佢會轉斡个聲，寒了要著衫， 錢毋罅要講，彎彎个聲跈到若無結無煞」，寫出阿姆个偉大，無時無刻對子女个關懷。本詩有息把散文化，好在最尾這句：「阿母个聲 ， 無聲」，一下間詩味全部湧出來，斷真無聲贏過有聲个千思萬念。

●社會組
1 老屋
這首客語詩寫老屋，一氣呵成，寫到迴腸盪氣，雖有部分華式客語之小缺點，大體來講係不可多得个佳作。這首詩開頭用恁樣來描寫老屋 ：「夢中个老屋，係海面項等入港个船，在絲絨藍衫个海竇肚，滉激啊滉激，激出碎銀樣个浪花，係阿姆个乳水」，盡像一下間分人跌入頭擺懷念時光，老屋毋單只係老屋，係一切曩擺懷念个象徵。夢乜毋單只係夢，夢係盼望个象徵。作者意象一轉，過再深沉寫：「夢中个老屋，係爺，係哀，正身閃光个窗門，係厥等盼望个目珠，千盼萬等，眺望田坵个該頭，遠方閕翼个子兒啊，哪久時，照得著若等轉屋个身影」，老屋係爺係哀，係盼望个目珠。毋故，老屋會舊陋，壁扇會必缝，親像係阿姆圓身个皺痕。到尾：夢中个老屋同阿姆無咧，山頭个塚埔，遠望野草莽生个老屋，風知得，代佢傳達這永久古老念想。---分讀者忍毋核同聲大道嘆！

2 裁員
《裁員》關切社會現實面，分人感傷著驚：「一張紙仔膏著壁項大字寫
工廠因為仰般……因為仰般....故所愛.. 自家唸 唸 唸 唸 :
我﹝ngai﹞無信，有我﹝ngai﹞名！我﹝ngai﹞ 無信，有我﹝ngai﹞名！ 仰會係我﹝ngai﹞！仰會係我﹝ngai﹞！」裁員个消息一公佈，得人驚个揚葉仔效應，黏時就爆發開來：該央時，像分雷公打著，頭那暈暈腦疺疺，踩踩踏踏、打激顫講毋出話。食無落、睡毋忒！愐起細人仔恁細，愛註冊、屋仔愛貸款、還愛過日仔…愛恁多錢？一屋大小擔頭還恁重！當得人畏！作者寫出被裁員者內心著驚盡深世界，乜講出大眾愛關懷个社會弱勢面相，本詩缺點係散文化，文字描寫做得可較精煉。

3 電子輓聯---記叔公太个告別式
電子輓聯---記叔公太个告別式，寫出新時代个新詩，佢叔公太以前在世時節摎人寫輓聯，楷書字正正盡有禮貌，寫隸書，雁尾就像一支刀仔，痛心時節會割人心肝，無愐到現下叔公太个告別式，用个係電子輓聯同愛響毋響个電子紙炮，本詩優點係使用新題材寫出新時代變化，缺點係散文化。

●學生組
1 時間个重量 -- 讀渡台悲歌
這首客語詩係史詩大作：「一直到時間流過，正知讀个係渡台悲歌，
輕輕合起台灣移墾史，四百頁个命落秤無風恁重，一聲道嘆長過河江」，作者大氣魄想愛寫出四百年台灣史，用恁短个詩實在擔毋起
這渡台悲歌。「時間有幾多斤重？仰般會將長喃喃个歷史
矺 到扁扁薄薄，睡到恬靜个壅塵下背」，歷史在一層一層灰塵底肚，作者一頁一頁扁開來，從第一頁， 唐山過烏水溝，六死三在一回頭， 到第三十六頁， 蟲蛀 ，第九十九頁， 缺角，第......，這係盡毋奈个故事，有兜蟲蛀有兜缺角，斷真係一聲道嘆長過河江！作者筆力雄渾，盼望未來能將本詩發展成千行史詩。

2 硬頸个女人
這係一首盡特殊个客語詩，作者註明：「本篇使用之客家語為馬來西亞華僑使用之大埔腔，其中因文化背景混合了其他客語及粵語詞彙。」作者个客語書寫雖然毋係原汁原味，毋故，做得完全看識，知得作者用當湛詩語言，描寫佢姐婆个硬頸偉大，一開頭作者恁樣形容佢姐婆：「妳桃花个鳳眼轉成歲月深深个折痕，
一世紀个長篇從亭亭少女个嬌羞，寫到全頭華白个自在，妳一路硬頸，柱等拐杖仍從毋低頭」，作者講佢姐婆頭擺做過「琉瑯女」﹝馬來西亞採錫的一種簡易方法﹞，作者也用巧妙方式，寫出佢姐婆拼命撐起一家燒暖个艱苦：「妳鍾意食甜，
仰般勸妳都毋聽，妳話無味無道毋當莫吃，咖啡愛甜糕點愛甜人生正有影，細阿妹仔个時候食个苦敢係還毋夠？」作者心思細密，寫來絲絲入扣。

3曇花
這係一首盡精緻个小品客語詩作，短短十六行無冗長散文化缺點，單純有味，詩想非凡。一開頭描寫就分讀者鼻到曇花清香味緒：「香夜風涼涼，掠過稻仔个甜夢，掠過樹仔个頭毛，掠過一支含等露水个花蕊，香氣芬芳」，作者使用詩語言形容曇花 --- 著等染著月光个白裙，孤栖个在更深夜靜，高貴个走出來，掛等微微个黃色笑容 --- 寫來得心應手詩意盎然，作者係做得分人盡期待个未來客家詩人。

● 結語
這屆參賽客語現代詩，毋單只客家族群，別个族群乜來參加。客語分較多社會大眾關心學習來書寫係盡好現象。這擺參賽作品大致水準當好。毋故，名次有限，難免遺珠之憾。參賽作品雖然有華客夾雜，用毋堵好客語字，感覺毋罅原汁原味，但係瑕不掩瑜，作者未來創作量增加後，定著會改善這兜缺點，使得作品客語文字過較精準。

 

張貼留言

<< Home