台灣客語詩壇个豐沛饗宴

《本文是應優秀客語詩人江昀之邀，為其新著《詩畫圓樓意象》寫下的讀析，適逢母親節，本文提到的《木蓮》 (得到第四屆桐花文學奬現代詩優選)是一首非常感人的客語詩》

●台灣客語詩壇个豐沛饗宴
江昀係盡慶个客語詩人，得過各種客語文學創作大獎，這擺伊將五十首詩，配合伊自家親手精彩繪圖出版《江昀詩畫圓樓意象》，詩中有畫，畫中有詩，交織出風起雲湧交響樂，分人目珠一金！

圓樓，指个應係閩西南獨有个土樓，用泥夯築个客家群居同防衛合一个大型圓型樓屋。圓樓意象，做得講係回歸追尋分人淰淰懷念味緒个客家意象。就像2013阿姆節 江昀創作个《木蓮》 (得到第四屆桐花文學奬現代詩優選) :

阿姆節个下晝
來到廟坪
拜訪一頭木蓮

一𥍉目
佢嗄擘開當多目珠
送來一蕊一蕊清香
𠊎赴毋掣接手

佢兜續一頭一頭行過來
打開雙手摎𠊎遮涼
水竇肚泅上泅下个鯉嫲
聒聒聒唱醒睡當晝个菩薩

頭一擺深深摸著
阿姆堅硬个石磨心
用一生人个重量
磨出相惜个奶水

日頭赤熱
摎脆脆个玻璃心
必到千析萬析个
星仔屎

斷烏了
菩薩渡𠊎過河壩
轉身看著
雪白个木蓮花頂
阿姆寫分𠊎个
目汁

本詩寫个係木蓮乜係阿姆，分人看到圓樓意象象徵，同圓樓意象相呼應，原想引述一小段出來解說，無故感情意象係像長江水，頭尾無法度分離，乜像圓樓缺一息角，意象就毋圓滿。故所詩人恁樣寫，分讀者跌入盡深个感動 --- 阿姆堅硬个石磨心，用一生人个重量，磨出相惜个奶水。轉身看著，雪白个木蓮花頂，阿姆寫分𠊎个目汁。乜盡像「九份煙雨」詩中意象----人在故事裡肚行跳，歲月在歷史項頓恬，一條條彎彎斡斡个梯排，緩緩仔細聲講年代久遠个前塵往事。

江昀个客語詩，使用客語精準，過較傑出个係，伊將客語淬鍊成純粹現代詩。像「山頂看景眼界開」，翻譯成世界个各國語言，乜係盡湛好詩：

上崎毋得半路坐
坐到故鄉个山路項」
看一生人無共樣个風景

還細時節
爺哀柔柔个風
燒暖吾个心肝窟

後生時節
朋友柔柔个風
吹涼吾个汗水

中年時節
社會柔柔个風
吹開吾个心胸

老个時節
子孫柔柔个風
吹過吾个白頭那毛

上崎毋得半路坐
孵出一生人个
春夏秋冬

短短个詩寫盡長長人生，從還細寫到白頭那毛，柔柔个風吹過一生人个春夏秋冬。本詩層次分明，盡像剝洋蔥，剝出人生悲歡離合个目汁。其實，江昀《詩畫圓樓意象》五十首詩作，伊詩心獨運，表現出各種色彩圓樓意象，每首詩都有動人力量。加上配合伊自家親手繪圖，將文字裡背个意象形象化，在讀者心靈增加一分美感衝擊，因此本書个出版，做得講係台灣客語詩壇个豐沛饗宴！

●江昀為詩集畫的 插圖