阿姆 （客語）

●阿姆  /陳寧貴

臨暗，日頭懶懶，跌落西片無麼該氣猛介檳榔樹頂，這時節我等十過儕細孲仔，佇禾埕盡暢搞聊，同時等待去田坵挲草一下晝介阿姆同叔伯母歸屋家。

阿漢搞到一身大汗講，我阿姆戴介笠麻索仔鬆忒哩喲，風會吹入佢頭那底背。阿豐緊透大氣笑嘻嘻講，恁樣毋係較涼哈。突然糊糊介泥色人影遠遠出現，阿錦大蛤蟆胲喊，汝看汝看，佢等歸來也。

行最前面係阿漢介阿姆，行路像鵝仔有息把一拐一拐，我看到阿姆用笠麻向我等緊迓，我等像禾嗶仔嘰嘰喳喳趕遽泄過去。佢等手項都有一大紮蕃薯葉，我等接過來，又趕遽搞生趣樣仔泄歸各人屋家。

歸屋家介阿姆先洗好手面，燃時，起火暖燒水洗米煮飯炒菜，將一家大小安頓好，

已經滿天星斗，月光一禾埕。食飽飯，各家大小端凳出來禾埕講趣妙，阿姆恬恬搖等紙扇，涼風中遂點頭啄咕，這時節介阿姆，會毋會發夢夢到自家還佇田坵挲草無？