星期二, 8月 14, 2018

四海大平安

●四海大平安
我等介客家語,有四縣海陸大埔饒平韶安,腔調有息把差別,盡像樂音介高低,堵堵好交織出好聽介歌仔:四海大平安!

恁親介聲音,恁靚介話語,聽著就分我等心頭,流過一陣又一陣,燒燒暖暖介溫流。故所客家話,毋單淨係一種語言,同台灣各種語言共樣,係互相溝通融合,共心協力發聲來:祝福台灣!保佑台灣!

●共下來相和
食台灣米飲台灣水,族群相惜像戽水上天,恁樣介台灣人,敢毋會壞勢?離鄉不離腔,我講客家話汝講河洛話,佢講新住民話抑係原住民話,這全部都係台灣話。有人講客家話有音無字,仰會好愁毋愁,愁六月天無日頭?這係強勢語族介拗蠻,事實客話有音乜有字,汝寫「可以」我寫「使得」,汝寫「對不對」我寫「著無著」,「茄子」係「吊菜」,「鋤頭」係「钁頭」。問題佇這位:我等有認同自家人無?有心打石石成磚,無心打井井無泉,適今晡日開始,大聲講客家話,大膽寫客家文,「蜻蜓」變「揚尾」,「老鷹」變「鷂婆」,承蒙台灣逐儕人,共下來相和!

0 Comments:

張貼留言

<< Home