●陳寧貴客語詩/ 戲

還細時節聽老人家講，堵好就好，毋好忒過份，正毋會搣到像貓扡粢粑脫爪毋得。頭擺聽毋識，有人生經驗以後正會了解。

●陳寧貴/ 戲

褪下社會小人物介身份地位

著起帝王戲服

佢介身影

一下間澎風起來囉

一手指天一手指地

盡像天地間介一切

都跪落佇佢腳下

看戲介人毋使愐忒多

大家共下坐尖來

歡歡喜喜欣賞

這大鑼大鼓炒作下介鬧熱

看到裡尾

看戲介人同做戲介人

共下流目汁共下笑翻天

戲做束逐儕拍拍勢窟

趕遽歸去

這時節恁氣派介帝王

褪下蟠龍戲服

縮歸小人物介真身

天光日繼續

為下一餐飯打拚