客家老伙房

三十年前，

我離開老伙房介時節，

大禾埕一群細人仔，

佇該歡天喜地走相逐！



三十年後，

我滿心期待轉老伙房，

無愐到看著介係，

大禾埕一群禾畢仔，

佇該興沖沖打嘴鼓相吵事！



該兜走相逐介細人仔，

到底逐去奈位也？

仰會賸到禾畢仔，

歇佇老伙房？



鄉親既經四散，

舊漏屋舍下，

毋見頭擺叔婆伯母，

日夜無閒介身影，

連想聽阿旺伯介嗽聲，

都聽無到咧！

這時節麼儕同我企共下？

單淨臨暗日頭下，

尋毋著故鄉介，

我霧霧介影仔。