老 伯 婆

老伯婆今年度好一百歲

同頭擺共樣

朝晨日頭一出來

佢就起床

端凳在大禾埕唇坐

看大人去上班

看細人去上學

者兜大大細細

全部係佢介子子孫孫



細莊介人

透早一下就走淨咧

佢就看燕子在屋簷下做巢

看蝠婆在頭那頂飛來飛去

看烏蠅停在唔知麼儕

跌落介圓糖頂巷

看憊了，佢就攝目珠

者下佢看到後生時節介自家

在大禾埕晒穀、打豆、做覆菜

一年又一年

頭那毛對烏晶變到灰白

嬌嫩介聲音也變到

同乾黃介樹葉落地介聲音咧



佢看到恁多

豁唔掉介過去

佢歡喜笑了

hakka 老伯婆


hakka hotan


大禾埕


大禾埕盡像人生介舞台

蓋多戲佇這位

一遍又一遍演出



農忙時節

晒穀晒豆晒到人面像紅面番鴨公

大人同細人講唔莫亂走

當當晝晝鬼上樹



平常時節

細人佇大禾埕搞聊

散落一地

歡歡喜喜介腳步聲



暗晡頭時節

大人端凳來大禾埕

講頭擺生趣事情

汝一言我一語盡像畫符誥

月光聽到笑迷迷



有時節大禾埕麼介也沒

一個九十歲老伯婆

坐在屋簷唇看大禾埕

緊看緊大

緊看緊空