陳秋白 / 朗喀巴山通路頂的謀殺

T 凱桑˙蘭卓
h 今年十七歲，舊年拄出家做葛朗瑪
e 伊佮十六歲的多瑪隨人儉了一千四百箍美金
y 相招欲對尼泊爾去印度朝拜達賴喇嘛

a 亻因佮另外一群人合做夥對拉薩向西行去
r 亻因日時隱身 暗時趕路
e 佇世界的厝脊頂，雪的花蕊含著自由的芳味

s 佇朗喀巴山的通路頂
h 少年、散赤佮滿腹宗教的熱情化做一條逃亡的影跡
o 雪佇尾後掩蓋腳跡
o 腳底的冰河想欲洗去亻因遺留的體味
t 冷酷的風搧著青損損的面
i 冰冷的空氣漸漸結凍
n 解放軍慢慢夯起銃枝
g 銃子拍破結冰的空氣像玻璃嗶碎

t 凱桑˙蘭卓拄掩護一寡囝仔盤過……
h ……伊佇斯洛伐尼亞登山客的鏡頭前倒落來
e 謀殺者的銃子繼續追掠驚惶的心
m 像一幕貫串的電影

l 白茫的雪景射出銃聲 銃聲哀悼死亡
i 白茫的雪景走揣信仰 信仰祈禱自由
k 白茫的雪景展開白色的翅胳
e 飛向達賴喇嘛悲嘆的心

d 佛曆2550年9月30日
o 凱桑˙蘭卓
g 雪，掩埋伊的信仰
s 伊共解脫的聲息留予世人的耳孔


●宋澤萊的評介

啊！又看到一首很好的台語詩。

明明白白的詩，如同明明白白逃亡的一條雪路；詩哀傷的結束，如同他緩緩的倒下。非人道的暴政的槍聲餘音如雷，響徹無際的白色山巔。

大好的詩！佩服！加油！