林央敏 / 二二八血歌

第六卷「相會若像隔一世」--之--第五節



「原來唐山過台灣的祖國，
是穿官服的虎將，
是幪(mua)軍衫的狼兵。
台灣人脫離殖民統治的歡喜，
一暝過了攏剿(ziau)散；
映(ng)望祖國疼痛的心肝，
一年過了起畏寒。
吞忍的島民吟唱〈天地謠〉：
台灣光復歡天喜地，
貪官污吏花天酒地，
警賊橫蠻無天無地，
人民痛苦烏天暗地！
吞涎的詩人吟唱〈四句聯〉：
台灣光復真食虧，
餓死同胞一大堆，
物價一日一日貴，
阿山一日一日肥。
吞怨的學生吟唱〈顧面桶歌〉：
三眠取利，吾黨所宗，
以建眠國，以進大貢，
諸惡多士，為民錢風，
日夜匪類，取利是從，……
吞聲安慰身在亞細亞的孤單，
低音吐出鯁在心肝窟的不滿。

「就安呢，台灣人囤(dun)積埋怨，
日透暝，囤成一粒新高山。
一九四七的二二七，暗頭仔，
專賣局佮警察隊的爪牙，
巡到台北大稻埕的天馬茶房外，
寡婦林江邁昧赴逃走，
礁焌(da-sor)的菸草連礁瘦的銀票被抄，
警察威風的槍托敲破寡婦頭，
昏迷在地，鮮血嚇驚伊的查仔子，
哭聲引爆台灣人的訐譑(gan-giau)：
『豬仔警察！姦恁娘！
豬野鹿！給菸還她！』
一粒憤怒激起的石頭抌(dim)向稽查員，
警察佮稽查員分路抽跤(ka)，
開槍嚇驚市民追趕的跤步，
拍昧(ve)破市民用身軀織起的網，
就射出無生目睭的槍籽，
射死一個圍觀的市民。
於是爾爾(nia)，台灣人火山爆發，
噴出『肅清食錢』的喝聲，
噴出『消滅阿山』的口號，
噴出『拍倒陳儀公司』的意志，
烈火染紅的埋怨燒做岩漿，
若像革命的血，
熔掉新發佈的戒嚴令，
一路湠(tua)對南方去。」
----------