張德本 / 佇人間最後的花園

佇人間最後的花園
會使毋免閣為花的色香空爭論
花紅就在伊妖豔，草綠就在伊生湠
隨人自在佇花欉邊含笑漫步
飛鳥隨意喙啄日光的種籽
新芽暴出輕巧，替換
枯葉飄落的稀微
琴音日夜伴奏歌聲
毋知唱過外濟歲月的影跡

佇人間最後的花園
會使毋免閣為物的歸屬相爭奪
強分你我的漸漸學會曉相疼惜
失去的請停止傷悲
失去是成全別人拾得
拾得的請免得意
拾得是接受別人的恩惠
物件的美好是因為善良使用
善用慈悲來庇蔭這個世界

佇人間最後的花園
會使毋免閣為人的愛情費猜疑
論條件的就隨人合管顧的鎖匙
意願適配的就結做七世夫妻
愛情不只是旋律配合樂器
分手毋是因為薄倖無情
是因為無怨恨互相釋放
真人男女深刻思慕的是
互相知己互相自由的情意

佇人間最後的花園
會使毋免閣為人的善惡來辯解
醜惡殘暴的向美麗馴良借鏡
泉水溢流浸冷恨火的刀劍
把權毋免蹚踏無辜的肩胛
避世袂放捨凡俗的無明
佛陀上帝神明同齊掌燈火
眾生脫離人間著火的厝宅
舉頭歡喜看到五彩的天光