濫濫庄

陳寧貴 / 濫濫庄
---記我開台祖碩仟公

十八世紀初
我等離開貧苦介原鄉嘉應州
為了絡食，同阿爸阿母道別
忍毋歇流下目汁
同越行越沈重介心事

渡海來台介時節
台南一帶已經有泉州漳州人開發仔
再也尋毋到著腳介地跡
我等祇有跈等
下淡水河一路南下
蓋像分麼介命運帶等
一步一介腳跡
慢慢仔行入荒涼介高屏平原
我等知得從今以後
客家山歌會適這響起
同原鄉介父老兄弟對唱

經過千辛萬苦
我等尋到一塊地來安頓自家
這下正有時間
偷偷仔整理痛苦介心事
恬恬去聽命運進行曲

這塊分我等生活介地跡
由於地勢低，一落雨
就氾濫成災泥漿亂竄
蓋像想愛將我等驅出這地跡
毋過我等介硬頸精神
毋會放過我等

我等定著
會一面唱山歌
一面將家園
適泥漿底肚撈起來