江 嵐 / 風時雨

　　

下晝四點
天頂烏天暗地大停電
雷公礱礱公公發性體
聶爧霹靂啪啦照光線
一陣大雨對烏山頭該片
驫一路過來
像走相趜樣仔
霹靂啵囉

白鶴仔囥到樹孔肚
禾畢仔囥到稈棚下
屋簷鳥飛到吾屋家
蓮花赴毋掣換遮
本本用佢抵日頭該支花做雨遮
紅青黃金紫个蓮花
企在水中央無奈囥
拐仔跳落蓮葉下
摝到蓮花笑哈哈

笑聲吂悚
風時雨走到無見影
拐仔跳上蓮葉頂
蓮花一蕊一蕊收遮
紅青黃金紫个觀音
企在水中央照影
屋簷鳥飛出屋簷下
禾畢仔飛過青竹園
一陣白鶴仔飛上天

風時雨行過个天時
日頭又來相借問
烏山攬雲想下班
鳥仔个歌聲特別甜