陳秋白 / 海是左派

●海是左派 (台語詩)
─致詩人 張德本 先生

伊是一隻變化的獸
頂日，伊是拋網的討海人
網走我的映望
昨瞑，伊吹起一陣涼風
留下二行熱戀的腳跡
今仔日，我走來海邊
伊是一條珍珠旆鍊
旆佇我的頷仔頸頂

伊是一隻變化的獸
是來來去去的風
佇伊的手掌頂
我是一蕊花葉
伊是無邊界的人
伊是奔走的溪
伊是開闊的河
佇伊的頭額頂
我是一片銀色的雪
佇伊的子宮底
我是一碗月光

伊是毋捌上岸的魚
伊毋捌停止思考
毋捌妥協
伊共湧縛佇身軀
佇我的身邊泅來泅去
伊是左派
永遠轟浪

-----------------
伊是奔走的溪，伊是開闊的河，
伊是左派，永遠轟浪！

此語應與台灣詩人共勉之！