真實

●陳秋白 - 離經是一種真理？


經過好長一段白色恐怖的時期
無法靠近的海邊
我終於來到
如失去的東西再度出現
把這喜悅藏在心靈深處
將挫折和絕望拋在腦後

─ 錦連〈有木麻黃的海濱〉

時常會當讀到已經八十歲的錦連先生發表的詩，這予我體會著歲數並無法度束縛錦連先生曠闊的詩人心靈。

我定定予伊詩內底的歷史感刺痛。著算，這片土地已經解嚴二十冬，我猶時常聽到詩人講著戒嚴白色恐怖時代，這島嶼頂頭所隱藏種種無人知影的不幸災難佮傷痕。人，總認為時間是療傷止痛的藥劑，敢是按呢？當記錄不公不義代誌的文學作品，形成歷史記憶流傳落去的時陣，時間不過是傳送的手，親像風對鵝仔菜的作用，終其尾會落土生根，管伊這碼的文壇流傳真濟疏離歷史記憶的作品。

我的頭殼內，到這碼猶定定浮出二十年前戒嚴時期的種種影像。青少年佮青年時期是學習人生知識佮人格思想起造的重要階段，佇這个階段，我的中國意識抵抗著對爸母遐來的臺灣意識。毋過，真正引導我行出這層迷霧的，是佇我有一遍結束美國的商務行程，欲對舊金山出境轉來台灣的時陣。彼時陣，我佇報到櫃台講行李欲運到ROC，毋過，彼位坐佇櫃台頂的女士真慎重問我講是毋是欲到China，佇我回講毋是的時陣，伊著提筆佇一張紙頂面寫著大大字的Taiwan，閣問我是毋是Taiwan，我回講：是。佇航機的廁所內底，我看著鏡內的我，回想機場彼幕情景，我的目屎煞因為完全認同Taiwan，無張持流落來。

啊啊 覺醒而想站立起來是否已經太遲？
─ 錦連〈第一鋤 / 守夜的壁虎詩集〉

猶未晏！錦連先生。毋過，彼戒嚴時期壓制思想的口號猶佇解嚴二十年後的今仔日，三不五時佇頭殼內發作葛葛纏。這予人精神衰弱離經的年代佮騙局，敢會當無聲無息著全盤掩蓋起來？這碼，這寡口號的發明者佮亻因的後代攏走去匿佇中華人民共和國的裙內。總愛有人出來對這段離經的歷史講清楚吧！啥會當安排全台灣人民去接受心理治療呢？敢講離經是一種真理？

人一向受政治佮歷史的牽制，文學關心人，當然未使脫離政治佮歷史，文學深深反省歷史，過去佮現實所刺的生命的網，詩、文學和藝術攏應該為著未來去衝、去撞這領網。

期待自早以來遮個政治撈仔，共國家定位，反攻大陸的歷史問題講清楚真厄，因為亻因對一切攏誠有興趣，獨獨對真實放外外，假意應付成做常態，予離經的代誌變做真實。講著真理，這已經是逐家一直無欲去發現、追求的狀態！也是人類世界因為私利來沈淪的緣由吧！

詩人時常受傷，毋閣未簡簡單單著死去。詩用暗喻接近光明，詩人透過奇想講出真象，政治用好聽的口號粉飾黑暗，政治撈仔用實利包裝虛假。誠濟人未發覺這一切，著算知影，有一寡人也會因為既得的私利失去勇氣，做夥狼狽為奸。

真正的詩比起政治佮歷史閣較接近真實。