星期四, 7月 10, 2008

吶喊

古能豪
春天的吶喊
  

每一擺選舉
咱攏聽著紅毛港春天的腳步聲
對候選人的喙內講出來
喙角全波
話山話水
紅毛港猶原咧等待

1968年「限建、禁建」的命令
將咱故鄉的歷史停佇遮
四十冬來咱封港、到市府、市議會
流血抗爭陳情
春天的腳步聲煞愈來愈遠
遷村是咱唯一的運命

全文→http://tw.myblog.yahoo.com/mrku4408/

乎咱開始有向望

小漢的時陣,阮攏將選舉的傳單,折甲賸候選人的相片,當做尪仔標咧七逃。

毋管是國民黨抑是黨外的候選人,只要會當乎阮贏,阮攏會將彼支尪仔標當做寶貝。

尪仔標的候選人,一路陪伴阮大漢。

讀冊的時陣,冊頂甲阮講,咱攏是中國人,偉大的蔣總統是民族的救星,咱著愛反攻大陸,「解救水深火熱的同胞」。

彼咧時陣,阮嘛對人寫著誠多三民主義統一中國的文章。寫甲足憤慨,但是越寫心煞越虛,中國到底佇叼位。

阮的心內越來越濟疑問無塊問,只有偷偷仔讀著一本擱一本的禁冊,台灣的形影越來越清楚的徛佇阮的目睭前。

但是,少年的時陣,阿母甲阮講,政治毋通插,228 白色恐怖太可怕。

毋管阿母按怎講,阮猶原走去政見發表會,徛佇台仔腳,大聲小聲喊,喊出台灣人出頭天。

驚嚇但是爽快的暗暝在阮每一咧夢中偷笑。

美麗島事件的發生,乎台灣歷史的發展開始改變,充滿著理想、自由思想的人越來越濟,阮嘛佇四界寫著真濟反對國民黨的文章,彼咧時陣,阮看著「有夢最美,希望相隨」的未來。

2000年3月濟濟的人攏咧歡喜,國民黨長期統治的的時代結束仔,台灣第一擺的政黨輪替,乎濟濟的人充滿著向望。

阮親像看著台灣已經走著家己的路,走入一咧有家己的文化的世界。

2008年,已經過了八冬,八冬來,阮的熱情一工一工消失,彼當年充滿著理想的人,為啥物無法度徹底消除國民黨執政時陣的歹習慣,為啥物無法度乎咱台灣變做一咧全新、清氣的國家。

阮實在袂當忍受「國民黨執政時陣的嘛是按呢」的講法,既然已經掌握權力,著應該將不對的代誌不對的制度全部做改變,但是,咱看著的煞是一齣不斷發生腐敗的連續劇,所有的連續劇到最後一定是歹人死了了。是毋是歹人應該死仔,所以才會發生2008第二擺政黨輪替。

阮親像轉去國民黨統治的彼時陣。

腐敗的代誌已經有夠濟,想不到佇欲落台的前規工,竟然會擱爆發擱卡大條的巴紐外交事件,牽涉的人竟然是彼當年充滿著理想的人,乎咱親像轉去國民黨統治的彼時陣。

佇第二擺政黨輪替確定,咱看袂著執政黨有任何反省,對著台灣主體意識,咱看袂著有任何向望,但是自從發生巴紐外交事件了後,相信會乎誠濟新一代有理想的人徛出來,親像彼當年,濟濟的人徛出來共款。

轉去卡早,咱著會看到希望。

0 Comments:

張貼留言

<< Home