詩想起

●該日我歸去老伙房

三十年前，
我離開老伙房介時節，
大禾埕一群細人仔，
佇該歡天喜地走相逐！

三十年後，
我滿心期待歸去老伙房，
無愐到看著介係，
大禾埕一群禾畢仔，
佇該興咋咋打嘴鼓相吵事！

該兜走相逐介細人仔，
到底逐去奈位也？
仰會存到禾畢仔，
歇佇老伙房？

鄉親既經四散，
舊漏屋舍下，
毋見頭擺叔婆伯母，
天光暗晡無閒介身影。
耳覺覺想愛聽老旺伯，
輒常背傴傴佇屋背細圳溝唇，
咳出連環炮樣仔介粗礪嗽聲，
半息都聽無到咧！

這時節麼儕同我企共下？
單淨臨暗懶懶日頭下，
尋毋著故鄉介，
我霧霧介影仔。