台灣輔娘

●陳寧貴

妻子客家話又安做輔娘，
頭擺農業時代，
輔娘蒔田挲草割禾，
渡大渡小蓄雞蓄鴨，
做粄煮食樣樣精通；
乜會裁會剪會繡花，
會籌會算會當家。

到現下工業社會，
輔娘無閒灶下事情後，
又遽遽去工廠做事，
賺多賺少騰手家庭經濟；
有兜去大公司做總經理，
運轉公司到世界出名；
有兜輔娘自家創業，
輒常事業發展到男人跈毋到。

恁湛介台灣輔娘，
實在得人惜，
實在分人盡佩服！
仰會有時節發生家暴案？
百年修得共下打拚這生人，
夫妻定著愛互尊相敬，
老公乜愛做，
當湛台灣男子漢！

註：
安做：稱做
頭擺：從前
渡大渡小：養兒育女
乜會：也會
跈毋到：跟不上
恁湛：如此好
仰會：怎會

---------------

●四海大平安

我等介客家話，
有四縣海陸大埔饒平韶安，
腔調有息把差別，
盡像樂音介高低，
堵堵好交織出好聽介歌仔：
四海大平安！

恁親介聲音，
恁靚介話語，
聽著就分我等心頭，
流過一陣又一陣，
燒燒暖暖介溫流。

故所客家話，
毋單淨係一種語言，
同台灣各種語言共樣，
係互相溝通融合，
共心協力發聲來：
祝福台灣！
保佑台灣！


註：
有息把：有點
堵堵好：剛剛好
分：給
我等：我們
故所：因此
同：與
共樣：一樣