星期三, 1月 07, 2009

阿婆介菜園 / 江嵐

頃接客家傑出女詩人江嵐
新出版精彩的客語散文集
----「阿婆介菜園」

江嵐的客語詩書寫
已卓然有成
如今客語散文書寫
寫來絲絲入扣
頗能觸發讀者獨特族群味蕾
的確是客家子弟學習客語書寫的好範本

「阿婆介菜園」附加華文翻譯
感人的客家作品
翻譯成華文讀來依然動人

在台灣客語書寫的作品甚少
還好有江嵐、葉日松、邱一帆
一本初衷
維持旺盛的客語創作力
而且屢見佳構
才不讓人感覺客語書寫的沉寂啊
真該向他們說聲:恁仔細!

-------------------
●江嵐客家散文 / 過 年

逐年過年辦年貨,捱總愛佬吾朋友講笑:「好可怕呀,外面到處兵荒馬亂。」

  在台北過年个時節,因為上班个原故,一定愛等到三十暗晡正放聊,盡尾日正有時間好辦年貨,臨時赴及,盡多東西愛採買。捱這兜職業婦女,盡會在上班時間順續款家私,過年期間毋管係銀行、郵局、菜市場、百貨公司、美容院……滿奈就係人山人海,人尖人貨堆貨比山還較高,等你擐到大包細包个時節,盡冤枉个係有錢就喊毋到計程車,著等狹裙套裝高踭靴个上班族,手項擐等大擐細擐个雜細,係一个盡生趣个畫面。毋過,捱總會當有效率辦好這兜事情,甜粄、發粄、菜頭粄捱會先註文好勢,金香炮燭咩會先打電話麻煩店頭家準備好勢,等捱過去納錢就做得擐走,毋使浪費時間在該等,攞細人仔買新衫,拚屋拚灶做得提前,買年菜正係大麻煩,青菜一定愛等到三十日正買,粄仔咩共樣,三十打早愛先去市場買菜、買水果。

  前一暗晡還愛去買當多花,捱想捱前生人怕係花精來出世个,除忒陽台種个花就算咧,還愛買喜氣洋洋个映景年花,歸屋間滿奈就係花,花香滿廳堂,目珠擘開來就看到花个笑容,鼻等花个香氣入睡,有一種天上人間个趣味。大家就知捱愛花成痴,年下仔咩會有人送盆景過來,反正吾个人生佬花同咖啡分毋開,浪漫又固執。

客家人對伯公盡敬重,一定會先去拜伯公,上家下屋提早拜年,大家就恭喜來恭喜去,歸伯公下鬧熱煎煎仔,大人細子佬牲儀備辦到盡澎湃:「恁久無看到,孫仔就恁高了。」有兜人在外位做事,難得過年轉來,有个新心舅,就單淨結婚該日看著一擺定定,路項相堵頭就認毋識哦,難得拜伯公个時節還做得順續認親,你講客家人係毋係盡會相惜。拜阿公婆,三牲五禮不可少,甜粄、發粄、菜頭粄,糖仔、麻粩、星仁糖,柑仔、黃梨同蘋果,還愛準備二粒結紅綵个年柑磧神桌,金黃色代表金銀財寶好年冬,聽講拜爺愛用圓圓个供果,表示圓滿,毋知係奈位傳來个風俗,總係圓滿最好。除忒以上有講到个供品外,還愛準備雞盤、封肉、長年菜、竹筍、魚仔、蘿蔔湯,一大鑊米飯攞碗筷,汽水同酒不可缺,對這時起三日三夜無斷香。

團圓飯食飽,就開始發紅包,阿公坐佇廳下食菸,阿婆手項拿等歸大疊个紅包,阿婆無輸像開銀行樣仔,分紅包盡大出手,別人恁般發紅包捱毋知,吾屋家係對盡細个開始發,新出世个新丁子盡紅,自古就有母以子為貴个風俗,新丁子有先拿紅包个權利,連做阿姆个咩共下先拿到第一个紅包。這時,大家就會喔喔喊,攞氣氛炒到熱噴噴仔,阿公阿婆个紅包,歸屋家人大大細細總下有,毋會跌忒一儕人。再過來係回敬,賴仔同心舅共下包磧年錢分爺哀,倆公婆倆公婆共下來,賴仔、心舅个磧年錢大部份就比爺哀包个較大包,係有孫仔、孫心舅个咩會來回敬,結婚過个就算大人,吂結婚个無限制,隨自家个意就做得,無包也無相干,毋過,旦旦都曉得在過年時節包分世大人紅啊咧,這係客家人一路里來个禮教。細人拿到磧年錢就出去打紙炮、打紙牌,搞到毋知人,係無喊轉來睡目,就搞到毋知好上床;大人泡茶食瓜子,打嘴古、講政治,婦人家在灶下無閒到捩捩轉,無到半夜就無停手,盡辛苦,毋過,收到紅包个燒暖,做得攞一年个疲勞消除淨淨,故所恩哩个紅包文化,還係有情有義,異生趣个禮俗。

客家人還有一個特別个禮俗,大年初一早晨愛食齋,意思係年初一食齋就代表歸年仔就食齋,食齋還有食齋个智慧唷。食芹菜表示勤勞,鹹菜係同人攞得,和諧个意思,芥菜係聰明有計,豆腐食了就大富大貴哪,食豆腐乾就做得升官發財,發粄代表發財个意思,蘿蔔粄係好彩頭表示好運到啦。當晝又還愛食蔥仔,食咧會聰明巧巧,蒜仔食咧就會除也會算,韭菜食咧就做得長長久久,食這兜菜做得分大家一年順序大平安,碗筷加一雙係希望再過添丁个意思,故所客家人盡有智慧唷!

年初二轉外家,大包細包个等路,阿公阿婆還愛炆糯飯分你帶轉去,淺黃色个糯飯,有香香个麻油羴(hien),糯飯面項有香著分你流口濫个白麻仔,大家就盡阿腦客家人个糯飯又靱又香當好食。阿哥也係老弟,成時係外甥仔會駛車來載,這係客家人个禮貌,阿姑轉外家係大事,阿舅、舅姆、表哥、表姐全部就會圍過來,轉外家个心情,做妹仔个人正知得,一種轉外家做嬌个幸福滋味,係人間盡靚个禮遇,故所人講婿郎係<嬌客>原因就在這位。

轉外家了後,就愛遽遽轉屋下準備,跈等就有親戚朋友來行春,還有盡多社會社團,來來往往个親朋好友會來聊,立法委員、縣議員佬縣長、市長咩會在過年時節來坐聊。毋過,堵到同學、朋友就盡鬧熱,無在這食晝、食夜,就無算好朋友,還愛佬後生時節个古老事情搬出來溜麵線,等老朋友、老同學轉去,該兜青春少年个輕狂事,續變做子女拿來消遣阿爸阿姆个點心。

對一個職業婦女來講,四、五日个年假真經無罅用,過一个年,對捱兜來講像係脫忒一層皮。初五開張,行入辦公室,大家嘴項講:「恭喜,恭喜,紅包收幾多?」逐儕就哀哀鯽鯽,喊腰骨軟痛,痶死了。細人過年著新衫、收紅包,婦人家過年做到喊毋敢。

0 Comments:

張貼留言

<< Home