《台灣客家語文學》創刊暨邀稿

台灣有可能產生
第一本全部用
客家話寫作文學有關个雜誌無？
請大家相招相報
互相鼓勵
請大家筆擎起來
實際行動
共同做一本客語文學有關个雜誌
世世代代延續下去

----------------------
《台灣客家語文學》創刊暨邀稿
----------------------

★刊物發行宗旨：
在台灣，客家話相對華語、holo語、英語來講一直係弱勢个語言，有人講「佢目前住在加護病房，強強會蓄毋生吔！」，看著、聽著、認知著這種情況个台灣客家人，敢毋會感傷？敢毋會愁慮？敢毋會一種想法同行動－恁衰漦！為著客家話个生存延續、創新發展，大家牽手打拚，分客家話在聽、講、讀、寫、作方面一個健全个環境，最起碼分客家話做為客家人个生活用語、教學用語、知識用語、文學藝術用語。

在台灣，客語文學比較華語文學、holo文學一直係弱勢个文學。大家就知，客家話係客家文化个承載，係客家文化个表徵，也係客家人之間最親切个溝通語言，客家文化就係客家人物質同精神生活个展現，也係客家人面對生活環境，在行為、價值、觀念、思想上个反應。假使客家話已經消失，這表示客家人對世界已經無麼个反應，也表示客家人已經在台灣這個世界消失吔！用客家話來寫文學，盡做得表現客家人个生活、情感、價值、觀念，也係挽救、延續、創新客家話个一種盡重要个方式！

煞煞－請大家筆擎起來，用客家話寫自家个感情、思想，用客家話來寫文學、寫評論！

煞煞－請大家筆擎起來，同自家、同客家面對个世界，展開心靈个對話。

煞煞－在客家話空前危機个時節，請大家ten手來延續客家話、創新客家文學。

★ 邀稿：請用客家話來寫
一、客語詩歌、散文、小說、戲劇。
二、有關客語文學个隨想、雜感、札記。
三、有關台灣客語文學个論述。
四、客語書評、短評、自由論壇。
五、客語文壇活動、文獻史料。
六、截稿日期係98年10月31日。

★ 投稿个相關辦法：
一、本刊係客語文學刊物 ( 非營利事業 )無稿費，謹奉送當期兩冊。
二、為節省人力、物力，來稿無論有採用無，一概無退稿。請自留底稿。
三、撰稿人除用漢文名以外，請加注客家話拼音。
四、來稿請附電子檔。
五、稿件請寄：

353 苗栗縣南庄鄉東村文化路3號
苗栗縣南庄國民小學
邱一帆 收
電子檔隨紙本附上 或 邱一帆信箱 ：tu6986@webmail.mlc.edu.tw
電子檔名請寫上 「投搞《台灣客家語文學》─ 姓名、篇名」

★ 注意事項：
請投稿个作者，記得附上詳細個人資料，方便校對聯絡。
像：姓名、聯絡地址、E-MAIL、電話這兜。
好比：邱一帆
353 苗栗縣南庄鄉東村文化路3號
E-MAIL：tu6986@webmail.mlc.edu.tw
TEL：0912-346986